U Bah Paul, u kyrtong MP ka UDP ha u 2014, ong u Dr Don

Shillong, 8 Naiwieng:
U Working President ka UDP u Bah Paul Lyngdoh un long u kyr tong MP jong ka UDP na ka bynta ka Shillong Parliamentary seat.
Haba pynpaw ia kane, u president ka UDP u Dr Donkupar Roy u la ong ba u working president ka party u Bah Paul Lyngdoh un long u kyr tong MP ka UDP na ka bynta ka elekshon Lok Sabha ha u 2014.
Wat la, ka party kam pat rai ban pynbna paidbah ia ka kyrteng jong u Bah Paul namar ba ka dang kwah ban iakren ban khot lang ia kiwei ki party ban wan iasynroplang hynrei la thikna ba u Bah Paul un long u kyrtong MP katkum ka jingpynbna u president Dr Donkupar haba kren ha ka jingialang jong ka UDP East Khasi Hills ha kane ka sngi Thohdieng.
Hynrei u la pynpaw ia ka jingsngew kmen ba ka party ka don ia u nongialam uba samla bad bat bit kum u Bah Paul Lyngdoh ban iakhun ia ka MP elekshon
“Nga sngew skhem ba ka party ka don jingkyrmen bha ba kan rah ia ka jingjop na Shillong Parliamentary Seat ha kane ka kynti”, la ong u Dr Roy.
Shwa ia kane, ka State Election Committee jong ka UDP ka la rai ban pynlong ia ka jingiakren ban iasyllok bad kiwei ki party ba don kajuh ka jingthmu ha kane ka elekshon MP 2014 na Shillong Parliamentary Seat bad ka la rai ban kyrshan ia u kyrtong ka NPP na Tura Seat.