Shillong: U President rang bah ka UDP u Dr Donkupar Roy u la kam ba u kyrtong ka Congress u bah Vincent H Pala u la syier bha ha kane ka kynti haduh ba u la kren kulmar namar ka jingiatylli ki seng riewlum.
Haba kren ha ka jingialap elekshon ia u kyrtong monlang ka MDA u Dr Jemino Mawthoh myn hynnin ka sngi ha Sohra, u Dr Donkupar u la ong u bah Vincent katba dang jan ki sngi u la nang kulmar, u la tare ruma ia ka kam Myntri Rangbah da kaba kynnoh ba dei u heh ka BJP bad president ka UDP ba khang ia u bah Prestone ban long Myntri Rangbah.
“La sngew kumba u (Vincent) don bynta lang, hynrei kane ka pynpaw ba u la long kap kap (nervous), katba nang mih ki sngi”, la ong u Dr Donkupar.
U Dr Donkupar u la ong ba u bah Vincent u la kynnoh ruh ba ka UDP ka pynduh ia u bah Paul Lyngdoh ban long CEM hynrei kane ka dei tang ka kam kren khlem nongrim namar ban jied CEM ka dei ka kamram ki MDC, ym ka kam u president ka party.
“Ka long shai kdar ba u bah Pala watla u long MP lah shiphew snem um pat long rangbah ban long nongialam haka jylla”, la ong u Dr Donkupar bad khot ia ki paidbah ban iatylli kumba iatylli ki seng riewlum baroh ban pynjop don burom ia u Dr Jemino hakane ka MP elekshon.
Ha kajuh ka por, u President ka UDP u la ong ba lada ka Citizenship Amendment Bill (CAB) ka kynthup lang ban pdiang nongshong shnong ia ki Muslim, ka Congress kan nym pyrshah satia.
“Ka Congress, ka la ong ba pyrshah CAB, ma ngi ruh ngi pyrshah da kajong ka nongrim.Ha kane ka kynti ba mynta (2016) ki mut ban pynkylla biang ia kane ka ain CAB da kaba ong ba uno uno uba dei u Khristan, Hindu, Sikh, Parsis, Jains, Buddist kiba wan na Afghanistan, Pakistan, Bangladesh shwa 2014, kin dei u nongshong shnong ka India. Mih ka jingiakhih ir, balei ka Congress ka iakhih pyrshah ia ka CAB ka dei bym kynthup lang ia u Muslim lada ka kynthup ia ki Muslim, ka Congress kan nym pyrshah. Hynrei ha ngi, pat ngi ong ynnai Hindu, ynnai Muslim, ynnai Khristan namar ba lada khot ia ki briew nabar ngin kylla rit paid nalor ba ngi la rit paid”.
U la ong biang, “Ngi ju kren bunsien ka Tripura, ha snem 1951, ki riewlum ha Tripura ki dei ki heh paid ki synshar hi hynrei mynta tang 18 ngut na ka 100 ki dei ki khar Hindu na Bangladesh, ngim lah ban khmih lynti ban iada ki seng ri thor ia ngi bad dei tang ki seng riewlum kiban iada ialade ia la ki briew lajong”.
U la ong ba ka ri Khasi-Jaintia kam ju don ka jingiatylli, ka ri ki 30 Syiem, kaba dap da ka jingiapait ha kaba u phareng u la ong ba lada ki Syiem Khasi ki iatylli ym lah ban jop thma bad ka jingkylli mynta ka long hato kane ka histori lah ban pynkylla ia kane ka jingiapait iapra.
“Ngi dei ban pynsangeh da u Full Stop ia kane ka jingiapait ka jaitbynriew. Ngi la iatylli baroh ki nongialam ki seng, ka dei sa pali ki paidbah ban iatylli”, la ong u Dr Donkupar.
Phi don ban ong eiei?