U bah LG Nongsiej un iakhun election 2018 & shen yn rai ia ka Seng

Nongstoñ, 20 Lber:
Ki paidbah nongkyrshan jong u bah L.G. Nongsiej MDC ka Nongstoin, ha ka jingialang kaba la long mynta ka sngi hapoh ka phyllaw iing jong u bah Nongsiej, da kawei ka sur kila iashim ia ka rai ban phah iakhun beit ia u bah Nongsiej kum u kyrtong ha ka election MLA sha ka iing dorbar thaw ain jong ka jylla ka ban sa long ha u snem ban wan.
Ha katei ka jingialang la wan ban iashim bynta ruh da ki spah ngut ki nongkyrshan ki jong u ha kaba ki la ia tai sani bha halor katei ka bynta bad hadien ba ki paidbah nongkyrshan ki la shim ia katei ka rai bad ki la ai ka jingkular ban kyrshan na ka liang jong u bah Nongsiej ruh u la mynjur ia katei ka jingtyrwa bad rai beit ban mih madan ha u 2018.
Ban pynskhem shuh shuh ia katei ka jingiakut ba la ia rai ha katei ka jingialang la thaw ruh ia ka Committee jong katei ka kynhun na ka bynta ban ia pyrkhat bad iatai sa na ka bynta ka Seng, ba u bah Nongsiej un leit pyniasoh bad na ka liang jong kitei ki paidbah nongkyrshan, ki la ai por ruh 10 sngi ia katei ka committee ban kan pyndep ia ka jingai rai ia ka Seng.
Shuh shuh ha kaba iadei bad katei ka committee la jied ruh ia ki katto katne ki dkhot jong ka kiba kynthupi ia u bah H.F. Marngar MDC barim, bah She Kharrit, bah S. Thabah, Commingstar Kharbani, Erristar Lyngdoh, D.E. Lyngkhoi lem bad kiwei kiwei kiba dei ki longkmie bad ki Samla bad la ioh ban jied ruh kumba 81 ngut ei ei ki dkhot na man la ki Primary Unit jong ka Konstitwensi.
Hadien katei ka jingialang u nongthoh khubor u la iohlad ruh ban iakren bad u bah Nongsiej bad ha ba kylli la u la don lypa ne ka jingthmu ba un leit ban pyniasoh bad kano kano ka seng bad na ka liang jong u bah Nongsiej, wat la um shym pat la kren shai ia ka seng ba un leit pyniasoh hynrei u la ong pat ba un jied beit ia ki seng Riewlum. Shuh shuh u la ong ruh ba ha kaba iadei bad ka seng, na ka liang jong u hap ban ap shwa ia ka rai jong katei ka committee bad u la ong ruh ba hadien ka rai jong katei ka committee na ka liang jong u ruh un sa pynbna paidbah noh shi syndon.