U bah LG Nongsiej, um shet kylla

Shillong, 10 Nohprah:
Ki nongtrei ka HSPDP na Nongstoin konstitwensi ki la pyrshah jur ia ka jingkren tohmet jong u Bah Ardent M Basaiawmoit uba  kynnoh ba u MDC ka HSPDP na Nongstoin u Bah LG Nongsiej um shym la kyrshan ia u kyrtong ka seng ha kane ka elekshon shiteng samoi ba dang shu dep shen.
Ha ka jingpynlait khubor mynta ka sngi ba la iasoi kumba 70 ngut eiei kynthup ki president, secretary jong ki tnad bapher bapher ka HSPDP, ki la pynpaw ia ka jing pyrshah jur ia ka jing kynnoh jong u president rangbah ka HSPDP Bah Ardent ia u Bah LG Nongsiej. “Kane ka jing kren jong u Bah Ardent ka dei kaba bakla namar ba kum ki nongtrei ka party, ngi sakhi ba u Bah LG Nongsiej u khlem leh kumta namar ba u wan sha shnong jong ngi ban ialap ban kyrshan ia u kyrtong ka HSPDP u bah Diosstarness Jyndiang”, la ong kine ki nongkitkam ka HSPDP.
Kine ki paidbah bad nongkitkam ka HSPDP ki la shim ruh ia ka rai ha ka jingialang kaba long mynta ka sngi ban ai ia ka jingkyrshan ba radbah ia u MDC Bah LG Nongsieh bad ia u Bah Morningstar Mawsor kiba leit ban kyrshan ia ka kynhun PDF hapoh ka jingialam jong u Bah Pynshngain N Syiem kum u CEM halor ki mat ba u ieng pyrshah ia ka sorkar jylla kaba thmu ban iuhroit ia ka hok jong ki rangbah shnong bad ban pyniaid jubor ia ka MUDA shabar ka Municipal. Lah ban kdew ba ka HSPDP ha ka jingialang jongka ha kane ka sngi dang shen ka la ai por 10 sngi ia u Bah LG Nongsiej bad u Bah Morning Mawsor ba kin weng noh ia ka jingkyrshan na ka PDF hapoh 10 sngi bad ba ki dei ban panmap, lym kumta kin shah pynher krad na ka party.