Shillong: Ka jingthung ka sorkar Meghalaya Democratic Alliance (MDA) ia u Bah DD Lapang kum u nongai buit ka sorkar, ka la pynlong ia ki paralok jongu, ban kynthah jur bad ban sin ia u kum u briew ba rhah bor rhah pisa.
Ka Kong Ampareen Lyngdoh ka MLA ka East Shillong kaba ju iadon lang bad u Bah Lapang ha ki snem ba la dep ha ka Congress, ka la kynnoh ba ka jingmih u Bah Lapang na ka Congress ka dei namar ba u kwah bor kwah spah namar ba kane ka party kam don ha ka bor.
“Ngam kwah ban pynrem ne kren bein eh ia u riew rangbah ba la pyni ia ka rukom treikam kaba bha, hynrei ngi iohi ba pleng ba watla la dei makna uba la nang la san hynrei imat uba la mlien ban don ha ka bor, kwah hi ban don ha ka bor”, la ong ka Kong Ampareen haba kren mynta ka sngi sha ki nongthoh khubor.
Ka la ong biang, “Ngim lah ban teh ban khum iano iano khamtam u briew uba la don naduh ban ialeh jylla. Ngi kitbok ba in ioh ia ka jingsuk ha ka sem thymmai kaba ki leit bad ka long ruh ka jingpynpeitngor ia ngi, namar ba ngim dei ban shu buaid bor than haba aiti ia ka ri bad ka jaitbynriew”.
Ka la kynthah da kaba ong ba ka jingshah thung jong u Bah Lapang kum u nongai buit ka sorkar MDA, ka pyni ba u la rhah bor.
“Haba la mlien ha ka bor, khlem ha ka bor, nga mut dur la long kum uto u biej”, ka la ong.
Ha kajuh ka por, u nongialam ka Congress u Zenith M Sangma u la kynnoh ba u Bah Lapang u dei uba rhah bor bad ka jingmih jong u na ka Congress bad khamtam ka jingshah thung kum u nongai buit kane ka sorkar, kam dei na ka bynta ban shakri ia ka jylla hynrei na ka bynta ka jingmyntoi shimet jong u.
Ha kajuh ka por, u Zenith M Sangma u nongialam ka Congress, u la ong ba shwa ba u Bah Lapang un rung sha ka NPP, lah dep tip lypa.
U la kynnoh ba u Bah Lapang u dei u briew u bym ju neh jingmut bad u dei ruh u briew u bym lah ban shan khlem don ha ka bor.