Shillong: Ka jingiakhun ha Mawthadraishan ha kane ka MDC ka ban wan ka lah ban kham thnem bha khamtam ia u kyrtong ka UDP u bah Jambor War, uba la iasuk lang da baroh lai ngut kiba iaknieh tiket, ban bynshet bad mynjur lang ha kyrteng jongu ban long kum u kyrtong.
Ia ka kyrteng u bah Jambor uba shah rem salit ha ka elekshon ba la dep, la mynjur da kiwei pat kiba pan tiket ba kynthup ia u bah Walson Sohshang, Bah Bengal Marngar bad u bah Aibanrikupar Syiemlieh bad ia kane, la shim ha ka jingialang kaba long ha ka 3 tarik mynta u bnai.
Haba twad jingmut na u bah Jambor mynta ka sngi, u la iathuh ba kane ka jingmynjur lang kine ki rangbah kiba la iapan tiket ban bynshet ha u ban iakhun ia ka elekshon, ka don ka jingkyrmen ban poi sha ka thong.
Katkum ka jingsngewthuh, ka jingiakhun ha Mawthadraishan kan long kaba kham paw bad ka HSPDP, lada ka don kyrtong uba biang.
“Nga kyrmen ba ka jingiakhun kan long kaba kham biang ha kane ka kynti namar ba ngi la iapoi sha ka jingiasngewthuh jingmut bad iatreilang”, la ong u bah Jambor.
La sngewthuh ba ka u MLA ruh u bah HB Nongsiej u la ai ka jingmynjur ban kyrshan radbah ia u kyrtong ka UDP ha kane ka kynti.
U MDC ka Mawthadraishan ba mynta u dei u bah Blanding Warjri uba la jop na ka HSPDP ha ka elekshon shiteng samoi hynrei u la phet noh sha ka PDF kham hadien bad mynta u dang pan tiket na ka Congress.