U bah Highlander, u kyrtong ka seng Congress na Mawryngkneng

Shillong: Ka seng Congress mynta ka sngi ka la pynbna ia u bah Highlander Kharmalki, ban iakhun ia ka elekshon shiteng samoi, na Mawryngkneng.

Ka Mawryngkneng Assembly seat ka la thylli noh hadien ba u MLA na ka party Congress u bah David Nongrum u la khlad kynsan ha u bnai ba la dep . U bah Kharmalki u la iakhun na kajuh constituency ha u snem 2018 na ka party PDF ha kaba u la long ba ar ha ka jingioh vote.

Na ka liang jong u MLA ka Congress party bad u kpa jong u bah David Nongrum (bam kwai ha dwar u Blei ) u bah Charles Pyngrope u la ong , “Ngi la khmih lynti ban ai ia u Bah Highlander Kharmalki, namar haduh mynta dei tang ma u ba la pan tiket”. U khmih lynti ba da ka jingkyrshan na ka iing jong ngi bad jong u, ki paidbah jong ka Mawryngkneng kin Kyrshan bad ai ka jingjop ia u kyrtong jong ka party Congress.

“Ha ka elekshon ba la dep u la wan ba ar bad ngam artatien ba mynta ka kynti un ioh ia ka jingjop”, ong u Bah Charles. Katba na ka liang jong ka National People’s Party (NPP) ka la jied ia u MDC Sohryngkham constituency u bah Pyniaid Sing Syiem ban iakhun ia kane ka election shiteng samoi, na ka bynta ka Mawryngkneng Legislative Assembly seat.