U bah George, ula shu kren lamler, ther U MR ha iing dorbar “Lada nga lamler ruh, ki paidbah, kin sa bishar”

Shillong:Ka jing iakren pynbeit pud, ka la khluit mynhynnin ka sngi, ha ka por kylli jingkylli hapdeng U bah George B Lyngdoh (TMC) bad U Conrad Sangma, myntri rangbah ka jylla.

U Bah Lyngdoh, ula leit rah ia ka mat iakren, halor ka jingthmu jong ka sorkar jylla, ban pyn beit pud, ha ka kylla kaba ar bad halor katei ka mat ula dawa ia ka sorkar jylla, ba kan lum lang ia baroh ki kynhun kiba don bynta, na ka bynta ban ia syllok, ha shwa ban poi sha ka soskular pynbeit pud bad ka Assam. Halor katei ka mat, u myntri rang bah, ula pynthikna, ba un khot ia baroh kiba don bynta lang, sha ka miej jingiakren bad ula ong, ba yn lum ia ki jingialang paidbah bad ki kynhun bapher.

Ka dei halor katei ka mat, ba U bah Lyngdoh, ula kynnoh ruh, ba ka sorkar jylla, ka la leh klet ia ki Hi ma bad ia ki nong shong khappud, ha ka sien iakren kaba nyngkong bad ka dei halor kane ka mat, ba U Conrad, ula khie bitar bad ula ong “Ka long kaba sngewsih, ba u dkhot, u ialam bakla ia ka iing bad ba u kren lamler” bad u ong shuh shuh ba ha ka sien nyngkong ruh, ula lum jingialang ia ki Hima, ia ka District Council bad kiwei de kiba don bynta ha kam pud kam sam.
Halor kane U bah Lyngdoh, ula ong ia U Sangma, ba um dei ban kdew kti shimet, ia u dkhot bad ba un kiar, na ka jing pyndonkam ia ka ktien lamler bad ula ong shuh shuh ba ki jingshisha, ki long ba ka Khasi District Council, ka pyrshah, ka hima Mylliem ka pyrshah bad ki paidbah, ki mih ban iakhih pyrshah bad ula ong shuh “Ban khot ia nga u riew thok, kam lei lei, namar ka dei ia ki paidbah, ba kin bishar”.

U bah George, ula wohnia ruh ba kumno ia ka pung dohkha, ki leit jurip ha ka por miet, nangta, ba ia kiba kwah ban iakren ruh, ki shah kynhiet pynban, ha u myntri jong ka sorkar Assam bad halor kane U Sangma, ula ong ba ka jingleit poi jong ki myntri ha ka por mynmiet, ka pyni, ba ki dei kiba trei shitom bad u Sangma, ula ong shuh “U dkhot u kren tang ia kawei ka jingleit jngoh kaba mynmiet, hynrei, ki don sa 6, 7 tylli kiwei pat ki sien, ba ki myntri, ki la leit jngoh ha ka por mynmiet bad katei ka pyni, ba ki dei kiba trei shitom”.