Nongpoh: Ha ka jingialang kaba la long myn ha ka 26 Tarik mynta u bnai ha ophis treikam ka Party NPP ha Nongpoh, la shim ia ka rai ban pynieng da u Bah C.B Syiem, uba dei u CEM barim ka KHADC, ban long kum u Kyrtong MDC na Nongpoh Constituency.
U Bah Lapang uba la ai khublei kitbok kitwriang ia u Bah C.B Syiem kum u Kyrtong MDC na ka NPP
Ha kaba shim ia katei ka rai ban pynieng da u Bah C.B Syiem, la sakhi da ka jingdon u Bah Lapang, Nongaibuit ka sorkar jylla, u Bah Minsing Makri, uwei na ki nongialam ba radbah ka Congress bad uba la pyniasoh NPP, u Bah Augustine Wahlang lem bad kiwei de ki riew rangbah ba la paw jong ka thain Nongpoh.
Khyndiat kum ban shu pynkynmaw hangne, u Bah C.B Syiem, u dei ruh u Kyrtong MLA na ka NPP ha kane ka Ilekshon kaba dang shu dep bad u la wan ha ka kyrdan balai kata hadien ba u la shah pynliem ha u Bah Mayraldborn Syiem, u Kyrtong na ka party Congress.
Kumta hadien ba ka NPP, ka la pynbna ia u Bah C.B Syiem kum u Kyrtong u ban sa aireng na Nongpoh, u Bah C.B Syiem un sa iakhun pyrshah ia ka Kong Rona Khymdeit, ka MDC ba mynta jong ka Nongpoh bad ia u Bah Balajied Rani, u Kyrtong MDC na ka Party Congress.