U Bah Ardent

Marwei phi ïeng kum diengbilat,
Ïa ka nongrim baskhem phi bat;
La ki pyrshang ban theh umpjah,
Mynsiem ieit Ri na phi kam jah.

Phi dei riewshlur ka jaitbynriew,
Phim tieng phim riej ïa ka basniew;
Watla phi hap ban shah shitom,
Ban shngaiñ ka Ri jingeh phi thom.

Mynshwa nga sngew tang na khana,
Shaphang ki riew ieit Ri shisha;
Kum Tirot Singh u Kiang Nangbah,
Haduh jingïap ki kloi ban shah.

Hynrei mynta da la ki khmat,
Nga i ï’u briew bashlur bastad;
U bah Ardent riewshlur jong ngi,
Khun dap shynrang ha ri Khasi.

Naduh tymmen haduh khynnah,
Ki ïapyrta beit “Ha u prah”;
U bah Ardent u pyntylli,
Ïa jaitbynriew baieit jong ngi.

Haba pyrkhat ï’u bah Ardent,
Marwei u ïai ïasait bad kren;
Sngewsih ban ong para Khasi,
Ïa u ki beiñ bad ki kdewkti.

Katno mynsiem jong nga ka pang,
Namar tang u marwei u thrang,
Ban shngaiñ u khun Khasi Khara,
Kiwei kim kwah kan long kumta.

Hynrei ko bah Ardent ïaphi,
Ngin nym iehnoh shiteng lynti;
Ngin ïai kyrshan ha jingialeh,
Watla hapdeng shibun jingeh.

Baroh kawei ka ri Khasi,
Ka donkam te shisha ïa phi;
To phin im slem ko bah Ardent,
Nangshait haduh phin da tymmen.

(Da u Samla Hopestarwell Snaitang, Seiñduli II, WKHD)