U Bah Anthony, u kyrtong Congress na Nongshken, Bah Jan na Lyngkyrdem

Shillong,12 K’lyngkot:
‘Niom la ka niom beit-niom la ka niom beit ha i Bah Prestone’ ka dei ka sur jingrwai kaba la mih na ka ryndang ba syiang u nongrwai ba pawnam ka Ri-War u Bah Anthony Khongwang ha kane ka elekshon MLA 2013 ba la dep. Mynta utei u nongialap elekshon (jong u Bah Prestone) da ki sur jingrwai u la kylla long u kyrtong ka seng Congress u ban ia reng ha kane ka elekshon MDC 2014 na Nongshken Konstitwensi.
Ki la don haduh 5 ngut kiba la thep kyrteng na ka seng Congress na ka bynta ban ia aireng ha ka MDC na Nongshken Konstitwensi, bad na kitei ki 5 ngut ka Congress kam shym la lah ban shim ia ka rai hanao yn bynshet bad kumta la pynlong da ka elekshon jied kyrtong ha ka 10 tarik mynta u bnai. Ki jingtip ba la ioh lum la iathuh ba ha katei ka elekshon kaba la shim bynta da ki 63 tylli ki unit kiba hap hapoh katei ka Konstitwensi, u Bah Anthony Khongwang u la ioh ia ka jingjop na 26 tylli ki unit kaba pyni ba mar shiteng na ki unit jong ka konstitwensi ki mon ban phah ia u. Haba phai sha Lyngkyrdem Konstitwensi ia ka tiket Congress la ai sha u Bah J.Tynsong u MDC ba mynta katei ka Konstitwensi.
Lah ban kdew ba shuwa ka elekshon jied kyrtong, kata ha ka por ba baroh ki kyrtong ki dang thep kyrteng da kawei ka sur ki la pynpaw ba kin ia kyrshan iawei ia iwei pat lada ka tiket kan leit sha uno uno ruh. La ioh jingtip ba ha ka jingialang jong ka Congress hadien ba la dep pynbna ia ka tiket baroh ki kyrtong kiba la thep kyrteng bad kiba la shah kyntait ki la pynpaw hi ia kajuh ka sur ban ai ka jingkyrshana ia u Bah Anthony Khongwang.