U Bah Anthony Passah kum u Rangbah Shnong ka shnong Pyllun

Nongpoh, 19 Nohprah: Ka Shnong Pyllun ha Ri Bhoi bad kaba hap ha ka Hima Mylliem, ka la ïoh ban pynthymmai ia ki nongkitkam ba thymmai hapoh ka shnong bad kata ka dei lyngba ka jingjied paidbah ban pynthymmai ia ki nongialam shnong, kaba la long mynta ka sngi ha Iing Dorbar shnong Pyllun.
Ka rukom jied nongialam shnong ha Pyllun, ka dei lyngba ka jingiajied jong uwei u Rangbah na kawei ka iing, kumta ha ka jingiajied paidbah, ki la ibit ia u Bah Anthony Passah ba un long kum u Rangbah Shnong, katba u Bah Blaian Kharbyngar kum u General Secretary lem bad 15 ngut ki dkhot ha ka Executive Committee.
Kitei ki nongialam shnong ba thymmai ka shnong Pyllun, kin sa treikam hapoh katei ka shnong, na bynta ka samoi treikam jong u snem 2025-28.
Na ka liang u Rangbah Shnong ba thymmai, u Bah Anthony Passah, haba kren ha katei ka sngi u la pynpaw ka jingkmen ba ki paidbah  ki la jied ia u kum u rangbah shnong  bad ha kawei pat ka bynta u pan ka jingïatrei lang na ki paidbah na ka bynta ban wan rah ka roi ka par bad ka bha ka miat ha Shnong ha thaw.