U Additional CS, um pule bha ia ki kyndon ain 1973, ong u CEM

Shillong, 07 Nailar:
U CEM ka KHADC u Bah Pynshngaiñ N Syiem u la ong ba ka jing pyntreikam ka Meghalaya Urban Development Authority (MUDA) ia ka Bye Laws sha jaka jong u pud u sam ka KHADC ka long beain.
U la ong ba ka jing kren jong u Additional Chief  Secretary ka jylla ba peit ia ka tnad sor u Prashant Naik ba ka Bye Laws ka MUDA ka lah ban treikam ha baroh ki jaka, u Bah Syiem u la ong,katkum ka Megha laya  Town and  Country  Planning Act 1973, ka la kdew shai ba ki ain jong ka MUDA kin nym trei kam satia sha u pud u sam ka District council bad kin treikam tang lada ka District Council ka pdiang lyngba ka jingthoh.
    “Haduh mynta ka District Council kam shym la pdiang satia ia ka Bye Law ka MUDA”, la ong u CEM haba kren hynne ka sngi Thohdieng sha ki lad pathai khubor.
“Ka Section I (ii) ka Meghalaya Town and  Country Planning Act, 1973, ka kdew shai ba ka ain kan treikam ha baroh kawei ka jylla hynrei lait noh ia ki jaka ba hap ha u pud u sam ki Autonomous District Council. Kane ka ain kan treikam tang lada kino kino ki  District Council ki kwah da kaba ai ia ka jingmynjur sha ka sorkar”, la ong u Bah Syiem.
U la buh jingkylli ha kano ka dur ka MUDA ka la nud ban skud ia ki jaka kiba hap ha ka District Council khlem ka jingmynjur ne pdiang ka Council.
“Ka jingpyntreikam ia ka  Meghalaya Building Bye Law 2011 ka sorkar ha ki jaka ba hap ha pud u sam ka KHADC”, ka long beain, la ong u CEM.
U la ong ba ka long kaba lyngngoh ban iohi katkum ka jingkren jong u Niak ba ka Bye-laws ka MUDA kan treikam ha baroh u pud u sam ka Shillong Master Plan. “Kumno ka sorkar ka lah ban pynmih ia ka jingpynbna ban pynhap ia ki jaka jong ka Council ha ka  Shillong Mater Plan khlem ka jingmynjur ka Council”, la ong u CEM.
“Kane ka jingleh ka sorkar ban skud jaka ka long kumba ka la pynkhein hi ia ka ain ba ka la shna”, la ong u CEM ka KHADC. U la ong ba ka Council kan hap ban leh da kaba tyngeh lada ka sorkar jylla ka dang iai bteng ban tam pud bad ban pynkhein ia ka ain jongka hi. Ha kajuh ka por, u la ong ba ka  Executive Committee ka la thaw ia ka Land Development and Building Regulation Branch kaban peit ia ki kam shna iing shna sem ha ki jaka ba hap hapoh u pud u sam ka Council. Ha kane ka Land Development and Building Regulation Branch  la thung kontrak ia ki ar ngut ki architect, uwei u Executive Engineer,  ar ngut ki Assistant Engineer bad ar ngut ki Town Planning Officer. ”Ngi thung kontrak ia kine ki nongtrei kane ka tnad thymmai ka Council bad ngin sa pynskhem hadien ba la dep ban rah hapoh ka iing dorbar” la ong u CEM ka KHADC.
Haba kylli hato ha kano ka dur ka Council kan lah ban siew tulop ia ki nongtrei kane ka tnad thymmai namar ba ka don hapdeng ka jinghiran pisa, u EM ba peit ia ka Town Committee u Bah Antonio War u la ong ba kane ka tnad ka dei kaba lah ban pynmih pisa nalade namar ba kan hap ban shim pisa na ki briew ba wan pan bor ban shna iing bad namarkata, ka jing kyrduh pisa kan nym don. Ha kawei ka liang, u CEM u la iathuh ba ka KHADC  ka la pynmih ia ka executive order (EO) ban pyntreikam noh ia ka Khasi Hills Autonomous District (Land Development & Building Regulation 2015) ha kaba iadei bad ka jingshna iing shna sem ha ki jaka ba hap hapoh ka Council.
U CEM u la ong ba ia kane ka EO la pynmih katkum ka rule jong ka United Khasi Jaiñtia Hills District (Establishment of Town Committee) (Third Amendment) Act, 2015.
 ”Ngi la pynmih ia ka EO ban pyntreikam noh ia ka rukom shna iing shna sem hapoh u pud u sam ka KHADC kaba la pdiang da ka Executive Committee”, la ong u Bah Syiem. U la ong ba ka jingpynmih ia kane ka EO ka long ban khang lad ia ka jingwan skud jaka ka MUDA sha jaka jong ka Council.
“Ngi shna ia ka ain shna iing shna sem katkum ka kyndon jong ka National Building Code. Ngi bud ia ka rukom kaba iasyriem bad ka MUDA da kaba thaw ia ka Expert Committee.  Mynta ka KHADC ka lah ban ai bor ia kito ki briew kiba kwah ban shna iing ban shna sem”, la ong u Bah Syiem.