U Aadhar, u long u bym lah lait, ong U CS haba iakren ha Nongstoin

Nongstoiñ:U Chief Secretary u ban sa shongthait noh na ka kam u Bah P.S Thangkhiew myn hynnin ka sngi ka 3 tarik u Nohprah, u la pynlong ka jing iakynduh ia ki bor pyniaid ka District bad bor pyniaid Sub-Division jong ka West Khasi Hills District ha Circuit House Nongstoiñ.

Ha kane ka jing iakynduh la synran ia u Chief Secretary da ka kurum jong u  bad bah D.P Wahlang u ba long u Principal Secretary jong ka sorkar Meghalaya bad ka la don ruh ka jingiaphylliew jingmut bad ki ophisar jong ka District. U bah Thangkhiew u la batai ia ka jingdonkam jong ar tylli ki mat jong ka Ri India ba la pyntreikam lyngba ka sorkar Jylla bad kita ki long u Aadhar bad ka Census ne ka khana samari.
Na ka liang jong u bah Thangkhiew ha kaba iadei shaphang u Aadhar, ula ong ba u Aadhar number u long u bym lah lait na ka bynta ki nongtrei kam sorkar, ki nongioh jingmyntoi na ka sorkar bad ha kiwei kiwei ki bynta kiba khlem ma u ngin ym lah ban pyntyllun ia ki jingtreikam na ka bynta ka jylla bad ka ri hi baroh kawei. 
Kumta ula iathuh ba ka jingpynrung kyrteng Aadhar kaba la leh mynshwa da ki private company la pyntreikam da ka sorkar jylla lyngba ki ophis jong ki Deputy Commissioner jong baroh ki District, katba ha kaba iadei bad ka Census pat ka long sa kawei kaba donkam ha ka imlang sahlang bad ha ka ioh ka kot jong ka Ri ula bynrap. 
“Ka sorkar jylla ka dang shaniah ha ka sorkar kmie ia ka tulop bad iaki jingthmu ban pyntreikam ia kino kino ki skhim,ka pisa ne ka fund bala ioh na ka sorkar India kan neh ha ka khana samari ne census jong ka Jylla” ong u Chief Secretary da kaba u la kyntu ba kan don ka jingiatreilang, ka jingpynleit jingmut bad ka jingaiti lut jong baroh ki tnad sorkar bad ki bor pyniaid District khnang ban lah ban pyntreikam bha ia kine ki artylli ki jingdonkam.
Kiwei kiba la ai jingkren ha ka ne ka sngi ki long bah M. Dhar SE PWD(Roads), bah U.Muktieh General Manager DCIC, bah A.Nongbri SDO(Civil) Mairang Sub-Division, bah S.Thamar Commandant 4th Battalion bad in-charge SP West Khasi Hills. Ia ka  prokram la pyniaid da u P.D.Sangma ADC bad in-charge Deputy Commissioner West Khasi Hills District.