U 2023, un leit sha bymjukut

AIS Suja

Ki snem ki leit ki snem ki wan. U 2023 un leit sha bymjukut, la bha la sniew u hap ban leit ym ba lah ban bat ia u namar ka long ka jingbuh beit jong u Blei Nongbuh Nongthaw. U paid bynriew ka pyrthei u rakhe ne ai khublei ia u snem rim bad pdiang ia kiei kiei kiba bha kiba thymmai jong u snem thymmai bad kane ka long ka rukom jong ka jingim briew ha pyrthei naduh uba biej haduh uba stad naduh uba duk haduh uba riewspah tam.

Hynrei to ngin pyrkhat jia aiu katba ki snem ki leit ki wan? Ka jingim briew ruh ka nang iaid sha kaba kut ki rta kein. Na ka jinglong khunlung sha ka jinglong khynnah, na ka jinglong khynnah sha ka jinglong samla, na ka jinglong samla sha ka jinglong rangbah, na ka jinglong rangbah sha ka jinglong tymmen, na ka jinglong tymmen sha kaba kut ki rta lane shaduh ka jingiap. Hato ngi ju pyrkhat ia kaba kum kane? Ba ngi la nang iaid sha kaba kut ki rta ka jingim?

U Syiem David, ha ka Kitab Salm u ong- “Naba ki sngi jong ngi baroh ki la iaid jah noh ha ka jingbitar jong me! Ngi pynleit ia ki snem jong ngi tang kum ka jingiathuh khana kai. Ki sngi ki snem jong ngi ki long 70 snem, namar ba khlain eh 80 snem. U briew u don tang 70 ne 80 snem, na kata ka daw u David u ong- “To hikai ia ngi ban niew ia ki sngi jong ngi. Kumta ban yn pynioh ha ngi ia ka dohnud ka jingstad” Salm 90:9-12. Ka mut ba ngi dei ban khein kor ia ki rta kiba ngi im hangne ha pyrthei da kaba tip briew tip blei.
Ka daw ka long ba ngi dei ki briew ym ki mrad, ba ka por kan poi ba uwei pa uwei u hap ban ai jingkhein hakhmat u Blei la bha ne sniew.

U Prophet jong u Blei, u Habakkuk, u duwai kumne- “Ah Trai to pynim ia la ka kam hapdeng kine ki snem, hapdeng kine ki snem to pynbna ia ka: ha ka pdeng ka jingbitar, to kynmaw ia ka jingisynei. Habakkuk 3:1-2. U Blei u dap da ka jingbitar ia ka jingleh jong u briew khamtam ha kane ka juk u kyrpad ia ka jingisynei jong u Blei wat hapdeng ka jingbitar jong u ia ki bynriew hangne ha sla pyrthei.

Kumta ka donkam ia uwei pa uwei uba rakhe ia ki snem thymmai ban iit ialade la u Blei u shem jingsngewbha ne em ha ka jingim, da kaba phai khmat sha u Blei ban ioh ka jingmap hapdeng ka jingbitar jong u. Namar ba ha uwei pa uwei u snem u Blei u lah buh jingkynmaw (Record) ia ki kam ba u briew u la leh, pan map da kaba ong – Hapdeng ka jingbitar jong Me, to kynmaw ia ka Jingisynei
Snem Thymmai Basuk ia baroh.