Shillong: Ka Malki ka la shah pylliem noh ha ka Nangkiew Irat da 1-2 kol ha ka jingiakhun jong ka lympung U-18 Shillong Premier League 2018 kaba long mynhynnin ka sngi ha madan Polo. U Aplang Buam ka Nangkiew ula thep ia ka kol ba nyngkong ha ka 6 minit bad ka kol kaba ar la thep da u Hiamdorlang Mairom ha ka 19 minit.
Ka Malki ka la lah ban pynphai kylla kawei ka kol ha ka kyllamiet lyngba u Donborlang Mawkhiew, ha ka 87 minit. Watla ka la pyrshang ban thaw lad ban ioh biang ban pynphai sa kawei ban pyniakhaid, kam shym la lah ban leh eiei shuh bad kaba sah mynta ka long ba ka Malki ka dei ban pynkhreh ban iakhun ia ka Sawmer kaban long ha ka 14 tarik.