“Tyrwa jaka U MLA Mawshynrut ia ki BSF”

Shillong, 21Lber:
U MLA ka Nong-stoin u Bah D Jyndiang u la ong ba ka sorkar kam dei ban ai jaka sha ki shipai ka ri India kynthup ia ki BSF hapoh 20km u pud u sam ka Nongstoin.
Haba wanrah ia kane ka mat ha ingdorbar mynta ka sngi, u bah Jyndiang u la ong ba ka sorkar ka dei ban sangeh shi syndon ban pyrkhat ban ai jaka sha ki shipai namar ba ki paidbah ka Nongstoin kim kwah ban mad jingeh kumba jia ha sor Shillong. “Hapoh 20 km na Nongstoin ngin nym shah ban buh ktem shipai. Shabar une u pud ngi lah ban ai jaka”, la ong u MLA ka Nongstoin.
U la ong ba ki shipai BSF ki dei ban leit shong buh ktem sha Maweit ne sha Shahlang ba jan khappud ym sha sor Nongstoin.
Haba jubab halor kane, u Myntri kam pohiing u bah HDR Lyngdoh u la ong ba ha ka jingshisha ki trai jaka ki la rai ban ai ia ki jaka ban buh ktem ki shipai BSF 65 Battalion ha Sohpian hynrei la pulom noh hadien ba pyrshah ka dorbar shnong.
Hynrei u DC Nongstoin u la ioh jingtyrwa biang ia ka jaka ha Umjaram, Pyndengrei Nongstoin ba la tyrwa 10 ngut ki trai jaka kynthup u MLA ka Mawshynrut u Bah Witting Mawsor ban ai jaka sha ki BSF kumva 100 akar.
Hynrei haba la pan ia NOC ban pynshisha ia ki jaka, kim shym la lah ban leh ia kane bad kumjuh ka dorbar shnong kam pdiang ban bun ktem shipai ki BSF.
“Kane ka kam ka la kut noh namar ka jingpyrshah ki paidbah bad bym ailad ka dorbar shnong”, la ong u bah HDR Lyngdoh.
U la ong ba ki BSF ki la ioh jingtyrwa na ka kur Sohbar ha Shahlang hynrei kim treh bad ki kwah beit ban buh ktem ha Thain Nongstoin.
“Kano kano kaba pyrshah ki paidbah, ka sorkar kan nym leh da ka bor”, la ong u bah HDR Lyngdoh.