Tyrkhong Um, mar ia shimti ka KHADC ia ka khlaw Lailad

Lailad, 29 Naitung:
Ki nongshong shnong jong ka Raid Sohkhwai kaba don haduh 6 tylli ki shnong ki la kynnoh ba ki tyllong um tyllong wah ha katei ka thain ki la sdang tyrkhong lut bad ki la ong ba kane ka wan jia tang khyndiat snem hadien ba ka Khasi Hills Autonomous District Council (KHADC) ka la wan ban shimti ia katei ka khlaw. Ki hynriew tylli ki shnong kiba hap hapoh ka Raid Sohkhwai kiba la mad ia ka jingtyrkhong um ki kynthup ia ka Umsohma, Umladoh, Umdu, Umden, Nongbah, Sohkhwai.
Katkum ka jingiathuh ki nongshong shnong katei ka thain ki la ong ba 35 snem mynshuwa, shuwa ba ka KHADC kan shimti ia katei ka khlaw, ka khlaw ka long kaba itynnad kaba rben bad la tap da ki tieng ki siej kiba pynmih ia ki lyer pyngngad, hynrei mynta ki la ong ba katei ka khlaw ka la stang iar bad ym shym la iohi shuh ia ki dur ki dar jong katei ka khlaw kumba ka long mynshuwa.
“Nga kynmaw ha kato ka por ba nga don dang 16 snem karta, ha ka por ba la wan shimti ka KHADC ia kane ka khlaw” ong u bah Wester Sawkmie uwei na ki riew rangbah ka shnong Sohkhwai haba ia kren bad ki nongthohkhubor. U bah Sawkmie u la ong ba ha katei ka por ka khlaw ka long kaba rben, hynrei mynta pat ka la stang iar ly-iar.
Katkum ka jingiathuh utei u rangbah u la ong ba kham mynshuwa ha ka por ba ka KHADC kam pat shimti ia katei ka khlaw bad ruh ha ka por ba ka dang shimti dang katto katne snem u la ong ba hap ban leit pyllait um khah khah ia ki pynthor kba namar ba ki dap um, hynrei mynta pat hadien ka jingpom dieng pom siej kaba jur ha katei ka khlaw bad ba ka khlaw ka la syllen u la ong ba ki pynthor kba ki la tyrkhong raw bad hap ban pun um ba kin im ki kba. U bah Sawkmie u la ong ba ka khlaw KHADC ka sdang naduh surok bah na Umling haduh Ir -Diengngan.
Katba u bah Turban Lyngdoh, uwei na ki riew rangbah katei ka shnong u la ong ba u la wan poi shong shnong ha katei ka shnong ha ki snem 2000 eiei bad u la kynmaw ba ka la don ka jingtuh dieng kaba jur na katei ka khlaw KHADC ha u snem 2001, 2002 ha kaba ka KHADC ka la die lilam lut ia baroh ki dieng ha u snem 2007-2008 ha ka por ba long CEM u bah C.B Syiem. Dei ha katei ka por ba ka khlaw KHADC ka la syllen lut la ong u bah Lyngdoh. Hynrei u la ong ba naduh katei ka por ym shym la iohi ia ki dak ki shin ba ka KHADC kan pynrben biang ia katei ka khlaw bad ka la sah kumjuh kumba ka long mynta.
Kitei ki riew rangbah katei ka thain ki la pynpaw ba ka jingdon ka khlaw KHADC kam pynmyntoi eiei ia ki nongshong shnong hynrei ka pynmyntoi pynban iano re iano. “Ngi nangmut ba ka jingshimti ka KHADC kan pynrben ia ka khlaw , ba kan long ka jingkyrkhu ban pynbiang ia ki tyllong um tyllong wah jong ngi, pynban ka la pynsyllen pynban bad pyntyrkhong ruh ia ki tyllong um tyllong wah” ong u bah Turban haba ia kren bad ki nongthohkhubor.
Kham shuwa ban ia kren bad kitei ki riew rangbah katei ka thain ki nongthoh khubor ki la leit ban jurip ia katei ka khlaw KHADC bad la lap ba ki don ki dak pomdieng kiba dang katto katne bnai ha katei ka khlaw kaba la pom ia ki dieng lynnong lynnong na kawei ka jaka bad na kawei pat, hynrei ym shym la iohi ba kin don ki dieng kiba thung bujli ha kitei ki khlaw, hynrei la iohi ba ki la don ki jaka ba la thung da ki kwai ki kait, bad kiwei pat ki jingthung kaba kitei ki nongshong shnong ki la ong ba ka dei ka Cash Crop.
Shuh shuh la ioh jingtip na ki nongshong shnong katei ka thain ba u pud u sam ka khlaw District Council bad ka raid kam long kaba shai bad U bah Wester Sawkmie u la ong ba haduh mynta ka KHADC ruh kam lai ban ai jingshai nangno ka sdang ka pud jong ka kaba u la ong ruh ba kam don ki jingthoh ne ki kot ki sla ban pynshisha nangno sdang u pud ka KHADC.