Tynrah ka trok iap uwei ha Tura, thang u paidbhur ia ka Trok

Tura: Uwei u briew ula iap ei, haba kawei ka trok, ka leit tynrah ia ka Scooty, kaba don ia u number ML 08 E 6916, hynnin ka janmiet ha Dakopgre, ong ka khubor.

Utei uba la khlad noh, dei U  Jini D Marak (35), uba shong ba sah ha  Rongkhon Songittal bad uba dei u trai jong kawei ka dukan die kot ha  Araimile ha Tura jong ka West Garo Hills (WGH).

Katei ka jingjia, ka la jia hynnin ka miet, ha ka por 7.30 janmiet bad katei ka dei ha ka por ba ka Scooty, ka dang iaid la ka lynti, katba kawei ka trok, kaba iaid bakla, ka la jynrat ia katei ka Scooty.

Ha katei ka jingjia, U Marak, ula khlad noh shen, katba sa arngut kiwei pat kiba don lang ha katei ka Scooty, ki la mynsaw jur bad kitei ki long U  Wilkan S Sangma (18) bad U Blestar G Marak (25). La iathuh ba U Blesstar, ula mynsaw jur.

Katei ka jingjia ka la pynbitar ia ki riew paidbah, kiba don ha katei ka jaka, ha kaba ki la thang ia katei ka trok, kaba don ia u number ML 08 A 0688, katba u nongniah jong katei ka trok, ula phet krad ialade.