Tynrah ka kali ka kompeni shna surok ia ka kali ki HNYF ha Wahlyngkhat, shah kem 2; kynnoh ka HNYF ba ki beh thong da ki nar rod

Shillong:Myn hynnin ka sngi, ka kali Alto jong ki dkhot ka HNYF, Shillong Region, ka la shah tynrah beit nadien ha Shnong Wahlyngkhat, kaba haneng Pynursla; ha ka kali Bolero jong ka kompeni, kaba trei surok Shillong Dawki; ka ARSS Infrastructure Project Limited.

Ka khubor pulit, ka iathuh ba ki nongtrei ka ARSS, ki la ujor sha ki pulit, ba ki dkhot ka HNYF, ha ka jing ialam jong U Bah Bless Dkhar, uba dei U President ka Shillong Region, lem bad kiwei pat ki dkhot, ki la ktah kti ia uwei na ki nongtrei jong katei ka kompeni bad halor katei ka jingjia, kitei ki dkhar, ki la beh thong ia kitei ki dkhot jong ka seng, kiba iaid da ka kali Alto bad ki la tynrah beit nadien jong katei ka kali ha Wahlyngkhat. Ym tang katta, la kynnoh ruh ba ki dkhot ka HNYF, ki leit ban dawa pisa bad byrngem ia kitei ki dkhar, kiba don ha katei ka jaka trei kam jongki ha Siatbakon.

Haba iakren bad U bah Sadon Blah, uba dei u nong ialam ka HNYF, u iathuh ba ki dkhot jong katei ka seng, ki leit ban wad jingtip, ia uwei u nongtrei, uba mynsaw ha ki khyndiat taiew ba ladep, ha ka jingshah ban ha u maw bad ban iakren bad ki pulit, halor ka jing tohkit halor katei ka jingjia.
Ha shwa jong kata, ki la leit shwa ha ka jaka trei jong katei ka kompeni ha Siatbakon, hynrei ha ka por ba ki wan phai sha Shillong, ki la shah beh thong bad shah tynrah ka kali jongki, ha ka kali jong katei ka ARSS Company. Mar ia shah tynrah, la iathuh ba ki dkhar, ki la hiar bad ki la sei da ki nar bad ki rod, da ka jingthmu ban bom ia ki dkhot jong katei ka seng, tangba donbok, ba ki la ioh ban phet krad ialade sha khlaw, kaba don ha katei ka jaka.

Ki pulit ki la register case ia kitei ki arliang mamla, halor katei ka jingjia, kaba la jia mynta ka sngi, ha ka por 1 baje nohsngi bad la iathuh ba ki dkhot jong ka HNYF, ki la shah kem 2 ngut, ba kynthup ia U bah Bless Dkhar, uba dei U President ka Shillong Region.

Lah ban pyn kynmaw, ba ha ka 19tarik mynta, u bnai, uwei u rangbah u ba la tip kyrteng kum u bah Bokstar Khongstid 35 snem ka rta u la ngat ha ka jingmynsaw jur hadien ba hap u maw na khlieh jong u, ha ka jaka ba pyntrei ia ka surok Shillong -Dawki. Katei ka jingjia, ka dei ha kaba ka kali puh shilum ka ba dang trei ha katei ka jaka ka dang khat ia ki maw bad ka khyndew ban thep ha ka truck, ka la pynhap da uwei u maw ba heh na ka khlieh jong u U bah Bokstar. La iathuh ba u bah Bokstar mynta u dang don ha ICU bad u don hapdeng ka jingbymtipbriew haduh ha kine ki sngi.