Sahkut ki briew hapoh ka kali Pickup Trok hadien ka jingjia aksiden ha ki thaiñ Rilbong

Shillong: Ha ka miet jong ka 10 tarik u bnai Nailur 2021 ha ka por kumba 9 baje eiei ka la don ka jingjia aksiden kaba jur bha kaba la jia ha ka surok Rilbong kaba don marjan bad ka Military Hospital Shillong bad kumjuh ruh hajan ka Anjalee Petrol Pump. Katei ka jingjia aksiden ka dei hapdeng kawei ka bos Night Super kaba don ia u rejistration nombar ML 05 T 8381 kaba dang wan na Guwahati bad kawei ka Auto Pickup trok kaba don ia u rejistration nombar ML 05 Q 6343 kaba wan na ka liang pyrshah.

Ha katei ka jingjia aksiden kumba laingut eiei ki briew ki la mynsaw jur kiba kynthup ia u nongniah jong katei ka Auto Trok bad ki arngut kiba shong lang ha katei ka Auto Trok bad kitei ki laingut ki la sahkut hapoh katei ka kali hynrei ia uwei napdeng kitei la lah ban sei noh na katei ka kali bad hadien kumba 1 kynta la lah ban sei sa ia ki arngut da ka jingwan iarap jong ka kynhun Search and Rescue Team kiba la hap ban shu ot ia ki bynta jong ka kali da ka mashin ban ioh sei ia kitei ki arngut. Ia kitei kiba la mynsaw la pynkit noh mar mar sha Civil Hospital Shillong ban ioh ia ka jingsumar.

Katkum ka jingiathuh jong ki briew kiba sakhi ia katei ka jingiia aksiden ki la iathuh ba ka daw jong katei ka jingjia ka dei namar ka jingbakla iaid jong katei ka Auto Pickup Trok sha ka liang ka bym dei ban iaid.