Tylli ki samla pule Khasi ban shimbynta ha ka Fresher’s Meet ka KSU RIST-USTM Unit ha USTM Killing

Nongpoh, 02 Nailur: Da ki spah ngut ki samla pule kiba dei ki Khasi, mynta ka sngi ki la leit ban iashimbynta ha ka (Fresher’s Meet) ne ka jingkynduh lang hapdeng ki samla Khasi kiba dang wan pule thymmai ha katei ka skulbah University of Science & Technology, Meghalaya (USTM) kaba don ha Killing Ri Bhoi.

Ha katei ka Fresher’s Meet kaba la pynlong da ka RIST-USTM Unit, la sakhi da ka jingdon u Samla Ferdynald Kharkamni, President ka KSU, NKHD, nangta u Samla James H. Mawphniang, General Secretary ka KSU, North Khasi Hills District bad uba long ruh kum u Secretary, Legal Affairs KSU Sengkmie, u Samla Alex Kharkrang, President ka KSU Byrnihat Circle, u Babu Dusyansar Mawlong, Nonghikai ha ka lain pule Khasi ha USTM, kiwei ki nonghikai kiba dei ki Khasi lem bad kiwei.

Lyngba jong katei ka jingiakynduh hapdeng ki samla pule ba thymmai hapoh katei ka skulbah, ka RIST-USTM Unit, ka la ioh ruh pynthymmai ia ki nongkitkam kiba pura jong ka RIST-USTM Unit na bynta ka samoi treikam jong u snem 2024/2025, kata ka dei namar ba ki nongialam barim jong katei ka Unit, ki la dep ia ki jingpule na katei ka jaka pule.