Tyllep ka jingduk tasam ia ki paidbah ka jylla Meghalaya rKi malik dewiong ki bat star ha Iewduh, ki kontraktor ha pung dohkha

Shillong, 7 Nailar:
Ka jingduk tasam ka la wan jia ha kane ka jylla, la kumba khyrwit ka ‘nem sniew ba shyr khei, ha kaba ka rukom im jong ki briew ka la ia pher bak lybak haba ia nujor bad ki khyndiat snem kiba la leit. Katei ka jingduk tasam ka la trei bor bah dang ha kine ki ar snem mynta bad ha kine ki ar snem ka rukom im jong ki briew ka la kylla da khongpong.
Naduh u 2014, ki jingkylla ki la nang kylla bad iai kylla suki pa suki haduh kine ki sngi kiba u paidbah, u la lynniar kthang bad kat shaba phai sha ka diang ka mon la iohsngew beit tang ka jingia ud duk. La kumba shah tyllep umsaw katei ka jingduk ka la paw tyngkrain shabar tang hadien katto katne bnai ba la khang ia ka jingtih dewiong ha kane ka jylla, namarba katei ka kam kam shyn la pynim ia ki nongkhaii dewiong, hyn rei ka ktah naduh ki nongbylla, ki nongshong iew, ki nongdie kali, ki jaka die umphniang kali, ki dukan kyiad, ki dukam dukan dih bad kiwei pat.
Namar ka jingtrei borbah ka jingduk ha kine ki ar snem, kiba bun bah ki briew kiba la im sahuh sahai mynshuwa bad kiba trei ia ki kam bapher bapher jong ki mynta kim banse shuh ban bat star bad leit sha Iewduh ban leit kamai da kaba kit Daju tang ban im jakpoh.
U nongthohkhubor u la lap ba ki don ki Manager jong ki malik dew iong kiba pahuh pahai, kiba dih da u sikret king size bad ka kyiad ruh kaba remdor; hynrei kiba pli, mynta kim donkam don jam shuh bad ki la poi ha Iewduh bad u star ha ka kti jong ki. Nangta la don sa ki nongniah kali naduh ki nongniah trok, ki nongniah kali Private mynta kim don lynti shuh da kumwei pat naba ki malik jong ki kim donkam shuh ban ai kam ia ki hynrei kaba kut ka lynti jong ki tang ban im shipor ka dei beit ban bat star ha Iewduh.
Kaba kham sngew sangsot ha kine ki sngi, ka dei ia ki kontraktor kiba la trei borbah bad theh lut ia ka pisa katba don ban trei ia ki kam ka sorkar, kitei ruh mynta ki la tlot iar ly-iar bad kim don pisa shuh ban dang iai kyrshan ram ia ka sorkar. Kiba bun na ki kontraktor mynta kim bang shuh tang ban iaid ban ieng sharum shaneng ruh, hynrei ka jaka pynsting jingmut jingpyrkhat jong ki ka dei ha ki pung dohkha. Ha manla ki thain katba poi iaid lynti sha ki pung dohkha la lap ba ki rawon kiba tista bha ban khwai ki dei ki kontraktor, naba ki la ngiah ki la jlep ban kiew ban hiar Shillong.
Kaba kham sngewsynei shuh shuh ka long ba kitei ki kontraktor mynta kim nud shuh tang ban plie ia ki mobile phone jong ki bad ki hap ban bret sharud ia ka Sim Card ba ki ju pyndonkam hynrei ban buh da kiwei pat ki sim Card kiba ia tip nombar tang shiing hi ban phone ia kaba donkam kyrkieh eh. Ka daw ba kim nud shuh tang ban plie Mobile phone ruh ka dei namar ba ka ram ka la dap rynjain naduh ka bainong ki nongtrei, ki bai tiar ki khar kaia, ki bai kor mashin ban pyntrei ia ki jingtrei jong ki bad kiwei pat kiba ki la shu pyndap pisa jubor ban pyndep ia ka jingtrei ka sorkar da ka jingkyrmen ba kin ioh kloi ia ka Bill jong ki , phewse mynta kiba pli ryngheng. Nangta sa ki dukan die tiar kali ruh mynta kim nud shuh ban dang ai ram tiar kali wat ia ki briew kiba ki ju ai puk puk ha ka por mynshuwa , naba tang ka pisa kaba rim kaba sah ruh la rynjain.
Ka jinghiar ka ioh ka kot ka jylla ka la ktah ruh ha kiba bun ki liang ia ki riew paidbah, naduh ki nongai wai ing kiba ju wai ia ki ing kiba heh bah eh kum ki dukan kiba la poi sha ka T.7 ne T.8 hajar tyngka shaneng ki la salia ban ai wai kulmar bad ki la salia ruh haba ki briew ki pynsah bai wai tang shibnai ne ar bnai naba ki la ngat ha ka apot ba kim ioh shuh tang ka bai wai ruh na ki briew kiba ki la ai wai.
Kat shaba phai la ha ka jinglong ka iew ka hat, ka kam ka jam jong ki briew, ka khaii ka pateng, ki la bun sa tang ki jingud duk bad ka jinglynniar na ki paidbah. Don ruh kiba la pynpep noh ia ki khun jong kin a ki skul kiba rem dor kiba ki la phah mynshuwa bad ki la phah pat sha kiwei pat ki skul kiba tad ka bai skul, naba kim ioh tyngka shuh ban kyrshan ia ki khun jong ki, lait noh kito kiba treikam sorkar kiba biang beit ka jingioh jong ki manla u bnai. Ka dawbah ba ka jingduk ka ban jur ha kane ka jylla jong ngi ka dei ka jingtyrkhong ka pla tyngka ka sorkar, bad nangta bud sa ka jingkhang tih dewiong, ter ter sa ka jingkhang tih maw tih shyiap, ka jingkhang pomdieng pom siej bad kiba bun ki jingkhanglad ha kiwei pat ki lad kamai. Na katei ka jingduk jingkyrduh kaba la wan ban tyllep ha kiba bun ki longing ka la don ruh ka jingiadie duh ia la ki jingdon jingem tang ban ioh pyndap ia ki jingdonkam kyrkieh kum ka bai skul khun bad kiwei pat ki jingdawa ha iing.