Twa khyndew ha surok RBBJ

Shillong: Ka seng Southern Border Youth Welfare Association (SBYWA) jaka Lakadong bad Rymbai, East Jaintia Hills District Khliehriat ka la tap ia bun tylli ki jaka ha ka shilynter ka surok Rymbai Bataw Borgkhat Jelaupr (RBBJ Road) ka la don ka jingtwa khyndew ka jur bha khamtam naduh ka turn shnong Umsatai bad haduh Pynurkba bad kiwei de ki jaka hapoh jong ka thain.
Kane ka jingtwa khyndew ka la jia namar ka jingjur palat u slap hapoh ka thain ha kine ki sngi ba la dep bad mynta ruh ha ka por mynmiet. Shuh shuh katkum ka jinglap jong ka seng wat kawei ka kynroh kaba dang shu dep pyntrei bad pynshna ruh kaba don hajan ka shnong Lad wahwapung ka la twa biang ha kane ka por slap bad kane ka la jia lehse namar ka jingpyntrei torti da u contractor uba dei pyntrei ha kine ki por ba la dep naba tang shu hap slap ka la twa biang.
Kumta halor kane ka jingtwa khyndew ha baroh shilynter ka surok ka seng ka la dawa na ka tnad PWD (Road) Khliehriat ban phah ia ki puhshilum na ka bynta ban weng noh ia kane ka khyndew ba la twa bad ha kajuh ka por ka la kyntu ia ka tnad ban pyntrei bha ia ka kynroh kaba don na Wah shnong jong ka Ladwahwapung.
Khatduh ka seng ka la kyntu ia ki ar MLA jong ka District lane ia ki bor ba dei peit ban iakren bad ia tnad PWD (Road) ban leh ia kaba donkam khnang ba ki paidbah kin long kiba shngain ha ka leit ka wan, ong ka ka khubor ba la phah da u NL Talang. Genl Secretary SBYWA