Twa ka nala, mih umpohliew hajan U Mot Don Bosco

Shillong, 21Nohprah:
Ka kong Agnes Kharshiing ka la ujor sha ki pulit ka Laitumkhrah PS bad ka la pyntip ruh ka jingshna ia ka nala hajan u mot Don Bosco ka la twa, kaba dei ka jingtrei kaba la sdang trei shisnem mynshuwa. La iathuh ba katei ka nala, ka la twa noh, ha ka 19 tarik mynta u bnai ha ka por janmiet. Ka kong Agnes ha ka jing ujor, ka la ong ba nalor ba katei ka jingtrei ka buh jingsyier ia u paidbah uba iaid lynti nangtei ka long ruh ka jingpynsyrwa kai ia ka pisa u paidbah.
Ka kong Agnes ka la dawa na ki pulit ba ki dei ban leh eiei ban pynshitom ia u kontraktor uba trei ia katei ka kam, namar ba katei ka jingtrei ka dei kaba lah ban wanrah jingmynsaw ia u paidbah. Ka la dawa ba ki pulit ki dei ban wad jingtip la u kontraktor uba trei ia katei ka kam u dei uba la don jingtip ne-em shaphang katei ka kam bad ka la dawa ruh ba dei ban pynngat ia u hapoh ki kyndon ain. Ka kong Agnes ka la ong ba ka tnad kaba ai kam ia utei u kontraktor ka la dei ban ujor ejahar pyrshah ia u bad ka la dei ban jurip ne tohkit ia katei ka jingtrei.