Twa ka MDP na Mawkynrew, ba iasoh Congress ki nongialam

Shillong, 13 Nailar:
Ka ktem ba khlain jong ka seng sain pyrthei ka Meghalaya Democratic Party (MDP) na Maw kynrew ka la pra namar ba ki nongialam jongka, ki la rai ban leit iasoh noh sha ka sem Congress.
Kane ka jingphet jongki kan long ka jingioh nong ia ka Mawkynrew Block Congress Committee (MBCC) shwa ban wan ka elekshon MDC.
“Ngi la rai ban phet noh sha ka Congress ban pynkhlain ha kane ka elekshon MDC kaban wan”, la ong u President ka MDP Mawkynrew unit u Bah Klip Lynshing ha ki nongthoh khubor ha ka nongbah.
Katkum ka jingong jong u Bah Klip, ka daw kaba la pynlong ia ki ban leit iasoh sha ka seng Congress ka long hadien ba la shah noh u President ka party u Bah Martle N Mu khim kaba la mih ruh bun ka kynrum kynram hadien ka elekshon MLA ha u snem 2008.
“Ka party ka la shah ktah jur hadien ba la shah rem u Bah Martle, wat ha ka jingshisha ngi la mut dur ba un wan phai biang ha u 2013 hynrei kane ruh kam urlong satia”, la ong u Bah Klip.
U la iathuh ba ki nongialam bad ki nongkyrshan jong ka MDP na Mawkynrew ki la ai jingmut ba un leit iasoh sha ka Congress hynrei, na ka liang u Bah Martle u la kyntait ia kane ka jingai jingmut.
U la iathuh ba hadien ba la shah rem u Bah Martle, ki nongialam bad ki nongkyrshan ka party ki la rai ban iehnoh shi syndon ia ka MDP bad ban leit pyniasoh noh sha ka Congress. U la ong ba ka party Congress ka dei kaba khlain kaba lah ban wanrah ia ka roi ka par namar ba ka skhem.
U Bah Klip ryngkat kiwei ki la pyniasoh sha ka Congress ryngkat ka jingiadon lang u president ka MBCC u Bah Teilang Blah bad u Vice president u Bah Kansing Lynshing.
U la kam ruh bas a kumba 20 ngut ki nongkyrshan ki la pynpaw ba kin wan ban pyniasoh sha ka sem Congress.
Ha kajuh ka por, u president ka MBCC u Bah Teilang u la ong ba ka party ka pdiang arti arjat ia kine ki nongialam ka MDP sha ka seng Congress.
U Bah Teilang u la ong ba ki dkhot jong ka MDP kiba wan ban pyniasoh sha ka Congress ki dei ki nongkyrshan ba radbah jong ka MDP kiba la pynjop bunsien ruh ia u Bah Martle ha ki snem ba la dep.