Twa ka khyndew bad ban ia ka iing, mynsaw 3 ngut ki heprit ha Mawlai Umthlong

Shillong: Ka HYC Mawlai circle mynta ka sngi hapoh ka jingialam u President, Bah Donboklang Kharlyngdoh ka la hiar kyrkieh sha ka shnong Mawlai Umthlong, Lummawnei ban jurip ia ka jingshah ban khyndew jong kawei ka longiing kaba dei jong I Kong Waddalin Mylliemumlong.

Ha kane ka jingjia shah ban khyndew bad jingtwa na sha lyndet kane ka ïing, 3 ngut ki khun kiba dang don hapoh ka kamra shetja ban bamja ha ryngkat u kpa ki la mynsaw. Ha ka por ba jia kane ka jingjia ba sngewsih, ym pat shym la ioh leh eiei namar ka khyndew ka la ban ia ka iing ha kaba ki khun ki la shah tap. Dei tad lyngba ka jingiarap jong u kpa bad ki paramarjan marpa la lah ban sei ia kitei ki laingut ki heprit. Kine ki laingut ki heprit kidei ba la tip kyrteng kum I Ibalincy Mylliemumlong 8 snem ka rta, Lumlang 6 snem ka rta bad I Iaiieitlang iba dang 2 snem shiteng.

Ka HYC ha kane ka sngi ha ryngkat ka jingdon lang u Rangbah Shnong, u Bah Tyllilang Mylliemumlong, ka ioh ban kner ka song jingiarap kaba rit eh bad ia kane ka son jingiarap la aiti sha u kpa, u Bah Resterly Ryntathiang ban leit ai jingsumar noh kham kloi hapoh hospital ia kine ki heprit kiba la mynsaw.

Dei tad lyngba ka jingshimkhia ka HYC bad u rangbah dong, ia kitei ki 3 ngut la kit mar mar sha Civil Hospital.

“Ngi dap da ka mynsiem kaba sngewkhia mar ia ioh jingtip na ki briew, ba la don ka jingban khyndew ia kane ka iing ha Umthlong Lummawnei. Ha kum kine ki jingjia, ngi sngewpap lada ngi shu shong kli kti tang ha ki rympei iing, te kumta ngi wan beh khnang shane. Ngi sngewkmen ba ka mynsiem iatiplem jong ki marjan marpa bad ki bor shnong ba la pynlong ia ki ba ki la lah ban pyllait im ia kine ki heprit na katei ka jingban khyndew,” ong u Bah Donboklang Kharlyngdoh.

U la ong ruh ba ka seng ka kitbok kitrwiang ia kitei ki khun ba kin ioh jingsumar noh kham kloi hapoh Hospital. U la kyntu ruh ia u MDC bad MLA jong ka Mawlai constituency ba kin phai khmat lem sha katei ka longiing.
U Rangbah Shnong ha kane ka sngi u pynpaw ia ka jingsngewnguh ia ka HYC Mawlai circle kaba la kloi ban wan mar mar sha ka shnong jong ki ban iarap lyngba ki kti basbun jong ki.