Tur paidbah ha ka 25tarik sha Secreteriat, ong ki Sengbhalang

Shillong, 23 Nailur:
Ki sengbhalang ba khot pynlong ia ka jingiakhih ban dawa pyntreikam ia ka Inner Line Permit (ILP) ha kane ka jylla, ki la kyntu ia ki paidbah ban ym tieng pyut ia ki jingpyntieng kohtympan ka sorkar.
Haba pynlait khubor ha kane ka sngi Nyngkong, u organizing secretary ka FKJGP u Bah Marbud Dkhar u la ong ba ki paidbah nong shong shnong jong jylla kim dei ban tieng ia ka jingbyr ngem ka sorkar hynrei kin leit ban iasnoh kti lang bad ki seng longkmie kiban pynlong ia ka jingshong kyrain ha phyllaw ka Additional Secretariat ha ka 25 tarik mynta u bnai. U Bah Marbud u la kyntu ia baroh ki paradoh parasnam naduh ki samla pule ki seng samla shnong ki seng longkmie bad kumjuh ruh ia ki paidbah ban iasnoh kti lang ha katei ka sngi ban pynbor ia ka sorkar ban pynurlong noh kloi ia ka jingdawa ban pyntrei kam noh ia ka ILP ha ka jylla.
U Bah Marbud u la kyntu ruh ia ki baroh ki dkhot na ki circle bad unit bapher bapher jong ka seng FKJGP ban kin ia mih shit rhem bha bad ruh ban kit khia ban ia mih ha kane ka prokram jingiakhih ba ki sengbhalang kila khot ban pynlong kaba la sdang naduh ka 23 haduh ban da kut khang ba ka jingiakhih jong ki sengbhalang kan long ka jop u la ong.
Ar tylli ki seng longkmie kynthup ka Civil Society Women’s Organization (CSWO) bad ka Khasi Women Welfare and Development Association (KWWADA) ki la rai ban pynlong ia ka jingiashong kyrain ha jaka pynieng kali jong ka Additional Secretariat ha ka 25 tarik `Nailur naduh ka por 11 baje mynstep haduh 3 baje janmiet ban dawa pyntreikam ia ka Inner Line Permit (ILP).
Ha kajuh ka por, ka Kong Agnes ka president jong ka CSWO ka la ong ba la rai ban leit shong kyrain ha katei ka sngi ban pynsngewthuh ia ka sorkar ia ka iap ka im jong ka jylla namar ka jinghiar ka synshar khadar, ka jingma ia ka imlang sahlang, ka jingkiew dor jong ki marbam mardih kaba la ktah jur ia ki paidbah, ka jingduh ei ia ka khyndew nongkynti, ka ain bym ia ryntih, ki samla kiba la shah pynduh noh ia la ki hok ban trei, ka jingpyndonkam bakla ia ka bor da kiba bun ha ka synshar khadar, ka jingwan hiar thma ki kompani ba don jingartatien, ka jingkiew ka bym iahap bad ka jingiaid ka por, bad kane ka la nang kynrei katba nang mih ki sngi bad ngi sngew ba ka jingleh mynthi jong ka sorkar ka long kumba iuhroit ia ka synshar paidbah bad ngim dei ban ailad ia kata.