Tur lamwir, ki briew U Sordar sha KHADC, ong ki 7 shnong

Shillong, 31 Lber:
Ka kyrwoh khu bor na ki hynniew tylli ki shnong ba kynthup ia ka shnong Mawkyn ring, Lumksah, Wah myntait, Mawkduk, Lumdieng ngan, Kyrdeng, Lumrit kiba hap hapoh Khyrim Syiemship ki la lum ia ka jingialang kyrkieh jong ki myngta ka step namar ka jingtur ki paidbah kiba la kam ba ki dei ki paidbah ka Raid Tynring myn hynnin ka sngi sha KHADC.
Ka Executive Committee jong ki 7 shnong katkum ka kyrwoh ba la soi da u ki hynniew rang bah shnong ka la kam ba katei ka jingleit tur sha KHADC ba la kam ba ki dei ki paidbah ka Raid Tynring ka dei tang ka jingleh lamwir ki paidbhur jong u sordar ba la shah sospon ka shnat Raid Tynring u bah CA Diengdoh, bad ki la kyntait ba na ka liang ki 7 shnong kim don bynta eiei ha katei ka jingleit tur sha KHADC.
Ha kajuh ka por ka kyrwoh na ki 7 shnong ka la iaroh ia ka jingsospon ka KHADC ia utei u sordar bad ka la ai ka jingkyrshan ba pura ia ka KHADC ha kaba ki la ong ba ka la leh ia kaba dei eh ban wanrah ia ka jingiaid beit iaid ryntih ha ka rukom synshar shnong haduh ki raid bad ki hima kaba long katkum ki riti ki dustur jong ki longshuwa man shuwa. Ia ka kyrwoh na ki shnong la soi da u bah A.Marboh Rangbah shnong Lumkseh, bah W.Nongdhar RS Mawkduk, T.Nongbri RS Mawkynring, bah Ison Mukhim, RS Kyrdeng, N Sumer RS Wahmyntait, Kopsing Jyrwa RS Lumdiengngan, bah P.H Mukhim Ra Lumrit.
Lah ban pynkynmaw ba mynhynnin ka sngi kumba 200 ngut tam ki paidbah ba la kam ialade ba ki dei ki paidbah jong ka Raid Tynring ki la leit tur sha KHADC ban pyrshah ia ka jingshah sospon u sordar C A Diengdoh, bad ki la buh por ba ka Council ka dei ban weng hapoh ka 5 tarik u iaiong. Lah ruh ban pynkynmaw ba ha ka jingleit tur sha KHADC ki la ia pyrta bad ia rah ia kip la kad ba ki pynrem ia u bah Hamlet Mylliem pdah Acting Sordar bad kumjuh ruh ia u MDC ka Sohryngkham u bah Pyniaid S Syiem.