Tura: Ka jing iakhih, ka jur bha mynta ka sngi, ha phyllaw jong ka Garo District Council, na ka jing dawa ban weng noh ia U Chief Executive Member jong ka Garo District Council, U Rakesh A Sangma.
U paidlang uba bun bah, uba wan na sha kylleng ka Garo hills, ula pynpra ia ka kut pahara ki pulit bad ula leit rung ha phyllaw ka Garo District Council, ha ka por 12.30 nohsngi bad ia hylla kyrkait, ba dei ban weng noh ia U Rakesh, na ka shuki Chief Executive Member.
Ka jing ioh rung jong ki paidbah sha phyllaw jong ka GHADC, ka la pyn kyndit ia ki nongtrei kiba don ha ki jaka trei kam jongki bad kaba la pynlong ba kin ia phet krad na ki kamra jongki, da ka jingtieng, ioh ka mih ka jing ia kulmar ha katei ka jaka, ong ka khubor.
Ki pulit ki la khanglad ban rung sha ophis jong ka GHADC, ha ka jingjngai kaba haduh 100metre, hynrei kitei ki paidbah, ki ia lum lang shi jaka ha Government College ha Teteng Aja bad nangta, ki ia iaid paidbah shriak bad rung beit sha phyllaw jong ka Garo District Council bad ynda poi ha ophis jong ka GHADC, ki seng bhalang, ki pynlong jingialang paidbah ban dawa ia U CEM, ba u dei ban hiar shuki noh mardor.
Ha ka jingialang, ki sengbhalang, ki la pynbna, ba kin iai bteng ia ka jing iakhih jongki, na ka bynta shi taiew kynthih ha katei ka phyllaw jong ka Council. “Kane ka dei tang ka sngi kaba nyngkong jong ka jing iakhih, hynrei ngin iai bteng, ha ki saw sngi, kiba wan sa wan” ong U Pritam Marak, President ka FKJGP Garo Hills, haba kren sha ki kotkhubor, hadien ba la wai katei ka jingialang paidbah.
Kitei ki seng bapher, kiba ialam ia ka jing iakhih paidbah mynta ka sngi, ki kynthup ia ka GSU, FKJGP, ADE, AYWO bad ka FAF bad kitei ki pyrshah jur ia U Rakesh, namar ba um dei U Garo nylla, ba un bat ia ka shuki CEM.
U Pritam, ula kren shai, da kaba ong “Ngim pyrshah satia ia ka jing ia khleh snam jong U Rakesh, hynrei ka dei ka long namar ba um ju bud satia ia ka dustur ki Garo, ha shi lynter ka jingim jongu”.
Phi don ban ong eiei?