Tuklar U SDO Sohra, ia ka jingpynrung kyrteng thep vote

Shillong, 7 Iaiong:
Kumba ju long ha ki snem kiba la leit noh ia ka kam pynrung kyrteng thep vote bad ia ka jingsngap jingujor ha Shella bad Sohra la leh hi da u BDO jong ki Block, ia ka Sohra la ju leh ha Laitkroh C& RD Block katba ha Shella pat la leh da u BDO ka Sohra, hynrei mynta ka kynti ka jingpynlong kyrteng thep vote ha Sohra bad Shella la sdang ban leh noh ha ophis u SDO (Civil) Sohra Civil Sub Division.
La iathuh ba u SDO (Civil) ka Sohra uba dang shu wan ban shimti thymmai ia ka kam hadien ka jingshah pynkynriah kam noh jong na Amla rem Sub Division hadien ba la mih ka jingpyrshah kaba bun na ki paidbah, u Ganshyam Das, IAS , la iathuh ba u la leit shim noh ia baroh ki phom pynrung kyrteng thep vote na ophis u BDO Shella baroh kiba rim bad kiba thymmai.
Halor katei ka jingpynkylla thymmai ia ka jingpynrung kyrteng thep vote ha Sohra, u MLA ka Sohra u bah Titos Chyne u la pyrshah jur bad u la ong ba ia ka hearing, pynrung kyrteng thep vote dei ban pynlong beit sha manla ki shnong kumba ju long ha ki por mynshuwa, dei ban leh ia ka hearing sha manla ki shnong ym ha Sub Division. Kumba long haduh mynta u bah Titos u la ong ba la sdang ban sam ia ki phom lyngba ka ophis u SDO bad don ruh kiba la dep ban pynpoi ia ki phom ba la dep pyndap, bad ki ban sa shah khot hearing. U nongmihkhmat ka Sohra u la pynpaw ia ka jingsngew lyngngoh halor katei ka jingleh khyllah ka Sub Division Sohra tang mynta, ha kaba baroh shi katta ia katei ka ka la ju leh beit ha ophis BDO , katba mynta pat ha Sub Division.