Tuid ki paidbah sha ka Seng kut Snem ka Seng Khasi

Shillong 23 Naiwieng:
Ki paidbah ba dang don ha ka niam tynrai na kylleng ki jaka jong ka ri Khasi bad Jaintia ki la tuid mynta ka sngi sha ka jingrakhe ia ka Seng Kut Snem kumba ju long man u snem.
Ia kane ka sngi la rakhe ban kynmaw ia ki 16 ngut ki nongseng ia ka Seng Khasi Mawkhar, Seng Kmie.
Ha ka por mynstep, la pynlong shwa ia ka jingduwai na Iing Seng ha Mawkhar shwa ban pynlong pat ia ka jingiaid paidbah na Madan Iew rynghep, Laitumkhrah, Shillong.
Ha kane ka jingiaid, da ki hajar ki paidbah kynthei bad shynrang bad kynthei ki la pynnoh ia ka jingiaid bad ka phawar ka risa ter ter ha surok haduh ban poi ha Madan Wei king, Jaiaw ban pynlong pat ia ka jingpyndep ia ka jinglehniam bad ka jingkren na ki riew rangbah halor ki phang bapher bapher. Ki paidbah ka Seng Khasi bad Niam Tre ki la rakhe ia kane ka sngi kaba ju long man u snem ha ka 23 tarik Naiwieng.
Ki paidbah na kylleng ka ri Khasi bad Jaintia ki la tuid sha kane ka Seng Kut Snem da kaba pynlong ia ka jingiaid kjat paidbah ryngkat ka tem ka put ka phawar ka kynhoi na madan Iewryng hep ter ter bad wan pynkut ha mdan Weiking, Jaiaw.
Kitei ki 16 ngut ki la ieng rangbah ban seng ia ka Seng Khasi ban pynkyndit bynriew ia u Khasi lyngba ka bor pyrkhat bad jingiohi jingai jong ki ban ialeh pyrshah ia ka jingthombor u nongwei nongar, ban pynduh pyndam ia ka jingngeit niam, ngeit rukom bad riti dustur Khasi.
Ha ka por mynstep, la kyntiew ia ka lama jong ka Seng da u Rangbah MF Blah President, la pynbud sa ka nguh ka dem da u Rangbah D Syiemlieh ia kaba la pynlong ha Ïing Seng- ha Mawkhar, ka pule Sneng Tymmen, jingrwai ba la ai da ki khynnah jong ka Seng Khynnah bad kren ai khublei da u Rgh Banteilang S Rumnong- General Secretary.
Hadien kane sa plie pat ia ka Iaid Pyni Riti da u Rgh KS Marbañiang ia kaba la synran lang da ki para kur ki para kha ha ryngkat ka riam ka beit tynrai arted haduh ban da poi ha ïing seng Mawkhar bad bteng biang ia ka jingiaid shaduh ka lympung ha madan Weiking, Jaiaw.
Ha madan Weiking, la ioh ruh ia ka jingkren na k riew rangbah bad hadien kane, sa ioh pat ia ka jingrwai iaroh ia ka Seng Kut Snem da ki khun samla ka Seng Khasi bad na ka liang u Bah Banteilang Sing Rumnong uba long u General Secretary, ka Seng Khasi ( Kmie), u sa pule ia ka kaiphod jong u snem. Nalor ki jingkren, ka nguh ka dem, ha kane ka sngi la ioh ruh ia ki jingrwai, ka shad tynrai kaba la pynkhreh bad ai da ki tnat seng bapher bapher. U general secretary u la pule ruh ia ka kaiphod jong ka seng Khasi.
La wan pynwai biang ha iingseng ha Mawkhar ha ka por janmiet da kaba iaid lynti na madan Weiking.