Tuid ki paidbah ka Mawhati, ba pynbna ticket MLA ka HSPDP

Nongpoh:Da ki hajar ngut ki paidbah na ki shnong bapher bapher hapoh ka Mawhati Constituency, hynnin ka sngi ki la leit ban sakhi ia ka jingleit pyniasoh HSPDP ka Kong Iva Kharbani, bad ka ban sa aireng ha kane ka Ilekshon 2023 na Mawhati Constituency.

Ha katei ka jingialang paidbah, kaba la pynlong hapoh ka shnong Umwieh snieh, Mawhati, la iohi ba nalor ka jingdon da ki hajar ngut ki paidbah kiba la bud ia katei ka Longkmie, la iohi ruh ba ki la don shibun kiwei pat ki riew pawkhmat na Mawhati, kiba la donlang bad kiba la shim ia ka rai ba kin sa ai ka jingkyrshan ia ka kong Iva Kharbani ha kane ka Ilekshon ban sa wan bad ruh ba kin pynjop don burom ruh ia ka.

Na ki heh ka HSPDP kiba la donlang ha katei ka sngi, ki kynthup ia u bah KP Pangniang President ba rangbah ka HSPDP, nangta u bah PB Sylliang President ka HSPDP Ri-Bhoi, u bah Khraw Marwein General Secretary lem bad shibun kiwei pat.

Haba shim kyllum ia ka jingkren jong baroh ki nongialam ka HSPDP ha katei ka sngi, ki la shim ia ka rai ba kin iatrei shitom ban pynjop don burom ia ka kong Iva Kharbani ha kane ka ilekshon 2023 na Mawhati Constituency.