Tuid ki nongleit tika ha Iewduh, bun ki bym dei ki Khasi

Shillong:Ha ka 16 tarik u bnai Jylliew 2021, la sakhi ia ka jingleit jong ki spah ngut ki nongdie dukan bad ki nongshong dukan ha Iewduh kiba la leit ban ai ia ka dawai injek tika hadien ba ka ophis jong u Syiem Mylliem bad ka ophis jong ka Deputy Commissioner jong ka East Khasi Hills District ka la bthah ia baroh ki nongshong die dukan ha Iewduh ba kin mih shakhmat ban ai ia katei ka dawai tika, ha shwa ba kin ioh biang ka lad ban plie ia ki dukan ki jong ki mynta ka taiew khnang ba kan long ka lad jingiada na ka bynta ka jong ki hi.

Ia katei ka jingai tika la pynlong ha thanat pulit jong ka Syiem Mylliem kaba don ha khlieh Iewduh.
Haba khmih ia ki nongwan ai ia katei ka tika la iohi ba bun na kine ki nongshong dukan kim dei satia ki Khasi.

Haba kren sha ki lad pathai khubor, u Bah MB Kharlukhi bad U Bah K Langstieh, ki myntri jong ka Hima Mylliem ki la ong ba wat la mynta ka sngi kadei ka sngi kaba nyngkong eh ba ki la sdang ia katei ka jingai tika hynrei ka la long pat kaba seisoh namar ba bun ki nongshong Iew kiba shong hajan jong ka Iewduh ki la noh sha katei ka jaka ban ai ia katei ka tika bad na ka liang jong u Syiem u ngeit skhem ba ha ki sngi kiba dang bud kin sa dang ia mih shakhmat ban ai ia kane ka tika.

Shuh shuh u Syiem u la ong ruh ba ia katei ka jaka ban ai dawai tika yn buh beit ha katei hi ka jaka hadien ba ki la dep ban kyrpad ia ka DC bad u la ong ruh ba ha ka 18 tarik mynta ka taiew yn shah ban plie noh ia ki dukan ha Iew hynrei ki hap pat ban plie katkum ka jingpyniaid da ki odd bad even nombar. Na ka liang ka Hima ka kyntu ruh ia ki nongshong die dukan baroh ba kin wan shakhmat ban ai ia ka dawai tika da ka mon laitluid ka jong ki bad lada kim ai ruh kim dei satia ban ong ia kiwei ruh ban bud ia ki bad ka Hima ka kyntu ruh ia baroh ki nongshong die dukan ba kin bud thik pa thik ia ki kyndon ba la bthah da ka sorkar jylla kata ban deng ia ki jingda khmut da khmat, ban sait ki kti jong ki bad ban ia ieng jngai iwei na iwei pat khnang ba lada la plie ia ka Iew yn plie beit noh ia ka shilynter bad ym donkam shuh ban khang bad lada kim kohnguh pat ia ki jingbthah ba la bthah lada khang biang ka Iew ka jingeh kan long ia ki hi hadien habud.