Tuid ki hajar, sha ka Rong ka Taw ha Mawphlang

Shillong, 27 Risaw:
Ka Rong ka Taw jong ki Mawbynnaw ne ka Monolith festival ba la pynlong da ka KHADC ka la kut noh ha kane ka sngi Saitjain, hadien ar sngi ha Law Kyntang ha Mawphlang kaba jngai kumba 25 km na nongbah Shillong.
Ha kane ka Rong ka Taw, da ki hajar ki paidbah ki la tuid wat la ka long ha ka sien kaba nyngkong eh hadien ba la seng ia ka KHADC ha kane ka jylla ha u snem 1952.
Ki paidbah na kylleng ki jaka, ki nongwei nabar ri, bad napoh kane ka ri, ki la wan ban sakhi bad ban mad ia ki jingbang kane ka Rong ka Taw kaba la wan ban iashim bynta da ki 53 Hima bad ruh ki jingpyni ba dei tynrai na kylleng ki jaka kiba hap hapoh ka jingpeit ka KHADC.
Ia kane ka Rong ka Taw la plie paidbah da u myntri ba peit ia ki rit paidbah riewlum u V Kishore Chandra Deo.
Ka don bun kiei kiei kiba pher shisha ha kane ka Rong ka taw jong ki Mawbynna namar ba baroh kiba la pyni, la leh ki dei kiba long tynrai, kiba kham niar ban iohi bad lap ha kine ki sngi ba mynta.
Naduh ka riam ka beit, ka bam ka dih, ka shad ka kmen, ki tiar ki tar, ka iing ka sem nalor kiwei, la sei ha kane ka rynsan, kaba ka KHADC ka la thmu ban long kum kawei na ki lad ban pynriewspah bad ban pynkhie im biang ia ki kolshor ba la jan duh bad ba la duh jong ki Hima Khasi.
Watla ka dei ka sien ba nyngkong ban pynlong ia kane ka Rong ka Taw hynrei lah ban ong ba ka long ka jingkyrmen bad ka jingai mynsiem ia ka KHADC bad ki Hima kiba iatreilang ban bteng ia kane ka kam ha ki snem ban wan.
Kiwei kiwei ki Rong ki Taw ne ki Tamasa ha ki snem ba la dep, kim ju ai lad ia ki kolshor tynrai ban sei madan.
Ki tamasa ba pynlong ha ki snem ba la dep, la pynlong na ka bynta ka jingmyntoi da kaba pynleit jingmut ha ki kam pyni riam pynmet, ki sur nongwei ha kaba ki jinglong tynrai kim ioh jaka than.
Hynrei ha ka Rong ka Taw jong ki Mawbynna ka KHADC ha Mawphlang ka dei ka rynsan jong ki tynrai ha kaba ki la ioh ka lad ban sei bad ban ieng ha rynsan. Ym lah ban niew tang ia ki jait ha kane ka Rong ka Taw ki Mawbynna hynrei tang kiba lah ban wan iuhkjat bad ban wan poi hi, ki lah ban shem bad ban mad ia ka jinglong jong ka.