Tuid ki hajar ngut ki riewngeit katholik ha ka jingpynkyntang lyngdoh ha Sakhain-Moolimen

Shillong, 18 Rymphang:
Da ki hajar ngut ki paidriewngeit na poh ka Diocese Jowai bad kiwei pat ki para bangeit na ki jaitniam bapher bapher ki la tuid sha ka jingrakhe pynkut ia ka Centenary jong ka Balang Katholik ha Sakhain-Moolimen, ban ia sakhi lang ia ka jingpyn kyntang Lyngdohsohblei ia u Deacon Manbha Pakem bad ia shim bynta ha ka jingiaid proseshon Iukharist kaba la long ha kane ka 16 tarik mynta u bnai ha Sakhain-Moolimen ka Parish Sutnga.
Ia ka Mass Bakhuid bad pynkyntang lyngdoh la lamkhmat da u Bishop Victor Lyngdoh u Bishop ka Diocese Nongstoin ha kaba la synran da u phadar Hilarius Lamare Diocesan Administrator ka Diocese Jowai ha ryngkat ki Lyngdohsohblei napoh ka Diocese Jowai bad nabar.
U Bishop Victor u la sneng la kraw ia u Lyng doh thymmai kynthup ia baroh ki Lyngdohsohblei u ong “To long ki Lyngdoh sohblei kiba sngewrit kiba sngewlem kiba sbun mynsiem kiba shakriblei bad kiba shakri ia ki paid u Blei bad ia ki briew baroh kiba donkam ia ka jingiarap jong phi” Nangta u ong ba ki briew baroh ki phai khmat sha ki Lyngdoh sohblei jong ka Balang bad u kyntu ia baroh ki lyngdoh ban long kiba pyndep hok iala ka kamram bad ka nuksa babha ia ki briew baroh. Haba sneng bakraw ia ki paidriewngeit u ong ba kane ka snem ka dei ka snem ban rakhe ia ki longiing longsem bad u kyntu ia baroh ki longiing longsem ki khun jong ka Balang ban im ka jingim kaba bha ka ban tei ia ka longiing longsem ha ka jingiaieid ha ka jingiatylli hapdeng ka kmie, u kpa bad ki khun, hapoh ka Balang bad ha ka jaitbynriew hi baroh kawei. U pynkut ia ka jingkren sneng kren kraw da kaba ong “To ngin im ka jingim kaba bha ha ka ban shakri ia u Blei bad iala ki para briew wat hapdeng ka jingkynthoh jong kiwei ia u Pope Francis, u Nongialam ba iohi jong ka Balang”.
Hadien ka jingknia Mass Bakhuid u Bishop u la pynllait paidbah ia ka kot jingthoh sahkynmaw (Souvenir) jong ka Balang Sakhain –Moolimen ha kaba la thoh ia ka jingiaid lynti jong ki riewngeit ha ki shispah snem bad ia ka Kaset jingrwai kaba la ai kyrteng “ Ha Pyrthai”
Ha ka nohphai sngi la pynlong ia ka Iukharist proseshon ha kaba la khlieh da u phadar Hilarius Lamare (Diocesan Administrator ka Diocese Jowai) ka jingkren bad ka jingkyrkhu da ka Sakrement bakhuid tam ka Duwan da u Lyngdohsohblei bathymmai phadar Manbha Pakem bad ia ka jingkren sngewnguh bad pynwai la ai da u ma Hermis Suja, Chairman ka Sakhain-Moolimen Centenary Celebration Committee.