Tuid ka jaboh Uranium, na saw jaka ha Nongbah Jynrin, ong ka KSU

Shillong: Hadien ka jingmih khubor halor ka jingbthei jongki tanks ba buh jakhlia uranium ha Nongbah Jynrin, na ka liang jongka KSU South West Khasi Hills District hynnin ka sngi hapoh ka jingialam u samla Jiedskhem Nongsiej, General Secretary KSU South West Khasi Hills District ka la leit ban jurip.

Ha ka jingleit jurip jongka seng hapdeng u slap uba jur, la lap ba ka jingpait jongki jaka buh uranium ha ki 4 tylli ki top, ka la kham jur mynta ban ia ki por ba mynshwa.

Naka liang ki dkhot ka seng ki la poi tang ha ki 4 tylli ki jaka buh jakhlia uranium bad ki don ki jaka ba ym shym la lah ban poi na ka daw ka jingheh um bad pynthut jong u slap. Wat la katta na ka liang ka seng kan sa leit biang, kat haduh ban lap iaki jingshisha baroh.

Ka jingheh jongka jingpait jongki jakhlia ba buh uranium ka pyni ba ki thliew ki la kham heh bad ym lah ban tip ioh lehse ki jingbthei ki mih na kine ki thliew ba ki dkhot ka seng ki la lap, ong ka kyrwoh na U bah Forwardman Nongrem, President KSU South West Khasi Hills District.