Tuid ka jaboh na ka skul JNV, sha ka dam um Mawphlang, lap ki MLA

Shillong:Mynta ka sngi ka 25 tarik u Jylliew 2019 ka Environment Committee jong ka Legislative Assembly ka la hiar jurip ia ka dam Mawphlang. Ia kane ka Committee la ialam khmat da u Bah H M Shangpliang, MLA, ka Miani Shira, MLA bad U Bah Renington Thongkhar ryng kat bad ki ophisar jong ka tnad Environment.

Haba ki la leit peit ia ka Jawahar Navodaya Vidyalaya (JNV)ki la lap ba ki jaka pyllait jaboh kim shem la trei kam bha bad ki jaboh baroh ka tuid sha ka dam Mawphlang kaba long ka jaka ring um jong ki nong Shillong baroh.Na ka liang ka Environment Committee ka la khot ban pynlong ia ka jingialang ba kyrkieh bad kine ki nong pyniaid kane ka jaka pule JNV bad ki la ai por ruh ia ka haduh 28 tarik u Jylliew ba kin pynbha ia ka, hynrei kin ym shah ban pynlong skul.

Ha kane ka jing jurip ia ka jaka pynkhuid um u Bah HM Shangpliang u MLA ka Mawsynram u la ong ba ka rukom pynkhuid ia ka um ka la dei ban pyndomkam noh da ki rukom thymmai ka juk mynta ban pynkhuid ia ka um.