Tuid hajar ngut ki paidbah, ha ka sngi pynkut ia ka Behdeinkhlam

Shillong, 16 Naitung:
Ka jinglehniam Beh deinkhlam kaba la sdang naduh ka 13 tarik mynta u bnai ka la kut noh mynta ka sngi balang ha kaba da ki hajar ngut ki paidbah na kylleng ka Ri Khasi bad Jaintia ki la wan ban sakhi ia katei ka sngi lehniam kyrpang ki khun ki hajat ka niamtre, la wan ruh ban pynphuh pynphieng ia katei ka sngi da ki nongwan jngoh kai pyrthei kiba la wan na kylleng ki jaka ban peit kai ia kane ka jingitynnad kane ka jylla, la pynkut ia ka Behdeinkhlam ha Aitnar, ka jaka ba kyntang.
Ki khun samla ka Jaintia na ki shnong bapher bapher ba kynthup ia ka Iongpiah, Dulong, Panaliar, Loomkyrwiang, Chilliangraij, Loomiongkjam, Tpep-pale Iawmusiang, Ummulong bad ka Shillong Sein Raij ki la wan ban rah ia ki Rot ba bunrong ban pynphuh pynphieng ha Aitnar. Mynta u snem ki jla don kumba 11 tylli ki Rot kiba la wanrah na ki shnong bapher bapher. Kitei ki Rot ba la wanrah ki dei kiba kit la ki jong ki jong ki jingmut, shuwa ban wanrah ia kitei ki Rot la pyndep ia ka niam ka rukom da ki tymmen ki san bad ki Doloi.
Ha katei ka sngi pynkut ia ka Behdeinkhlam la wan ruh ban sakhi da u Lat ka jylla u Dr.K.K Paul, u myntri ka tnad PWD u ma Sniawbhalang Dhar, u ma Ngaitlang Dhar, u MLA na Umroi bad kiwei pat ki nongshah khot sngewbha. Haba kren sha ki paidbah ha katei ka sngi u lat ka jylla u la pynpaw ka jingkmen ban ia donlang ha katei ka sngi lehniam ba kyrpang ha ka jylla, bad u la pynpaw ba u don ka jingkyrmen ba skhem ba katei ka jinglehniam kan wanrah jingsuk, ba ki briew ka jylla kin im pahuh pahai. U la ong ba ha ka Ri ki jla don bun jait ki jinglehniam jong ki jaitbynriew bapher bapher bad kiba kum kitei ki jinglehniam ki dei ki dak kiba pyni ia ka jingiatylli jong ki briew.
Ha katei ka sngi ka la don ruh ka jingialehkai phutbol kaba ki khot ka ‘Dat Lawakor’ kaba long ka jingialehkai kaba la shan bol da ka dieng, ka jingiakhun ha katei ka phutbol ka long hapdeng ka kynhun U Langdoh kaba la mih khmat ia ka Pynthor-Wah bad ka kynhun U Sangsot kaba la mih khmat ia ka Pynthor-Nein , la pynialeh ha Pohsawiar. Ka Pynthor wah bad ka Pynthor Nein ki dei ki ar tylli ki pynthor rep kba kiba la tip kum ka pliang ja ki nong Jowai. Ha katei ka jingialehkai la ju ngeit ba lada ka kynhun u Langdoh ka jop u kba u khaw met ha Pynthor-wah bad lada ka kynhun u Sangsot ka jop u kba un met bha ha Pynthor Nein.