Tuid da ki phew hajar ki paid riew ngei khristan

Jowai, 20 Lber:
Ka jingiaseng KJP Synod Mihngi kaba khadsaw ka la kut noh mynta ka sngi ha kaba da ki phew hajar ngut ki paidbah ki la wan tuid na kylleng ka ri Khasi bad Jaintia.
Ki heh sorkar naduh u Chief Minister, u Dr. Mukul Sangma, u MP Vincent H Pala, u nongialam ka liang pyrshah, u Dr. Donkupar Roy Lyngdoh, u MLA ka Jaiaw, u bah Paul Lyngdoh, u MLA ka Sutnga u ma Hopeful Bamon nalor kiwei kiwei ruh ki la wan ban sakhi ia kane ka jingiaseng bah ka KJP Synod Mihngi.
Mynta ka sngi U Blei, ki nongkren ki kynthup ia u Pastor KS Shylla uba la kren ha ka jingiaseng 10:30 am bad u Pastor Dr. RR Convile uba la kren ha ka jingiaseng ba-ar.
Ki kynhun rwai Choir kiba kynthup ia ka Jingiaseng Samla Balang Phudmari, Ka Jingiaseng Samla Balang Sutnga bad ka Jingiaseng Samla LumMawbah ki la ai ia ki jingrwai ha ka jingiaseng 10:30 am katba ka Jingiaseng Samla ka Blang Smit, Ka Standing Choir KJP Synod Mihngi bad ka Standing Choir KJP Synod Sepngi ki la rwai ha ka jingiaseng kaba 1:30 pm
Haba kren ha ka jingiaseng kaba 1:30 pm u Pastor Dr. RR Convile kaba la pynshong nongrim ruh na ka shithi sha Appostol Paul sha ki Nongphillippi 3:10, u la ong, kum ki Khristan lada kim pule ia ka Bible katta ka jinglong Khristan kam don jingmut satia. U la ong ba ki don lai tylli kiei kiei kiba ngi dei ban leh kum ki Khristan, kaba nyngkong kadei ban pule ia ka Bible, kaba ar dei ban dem ha ki jingduai bad kaba lai pat ka long ban leit sha ki jingiaseng.
U Senior Executive Secretary ka KJP Synod Mihngi, u Pastor NS Phawa, u la pyntip ruh ba ka KJP Synod ha Khasi Jaintia kan rakhe ia ka lyngkhuh snem kaba 175 jong ka mynta u snem ha kaba yn tei ruh ia u dur mot sahkynmaw ia ka dur ohshrong jong u Thomas Jones.