“Triang” ieng skhem ka CCIB ban pyrshah ker sainar shiah

Shillong, 1 Rymphang:
Haduh mynta ka sngi, ka Co-ordination Committee on International Border (CCIB) ka ieng triang ban pyrshah ia ka jingthmu jong ka sorkar jylla ban shim jaka noh na ka bynta ban ïaid shakhmat ïa ka jingker sainar shiah ha khappud India-Bangladesh. Dang ha ka taiew ba la dep ka CCIB ka la leit ban ai jingthoh sha u Deputy Commissioner ka East Khasi Hills ban pynpaw ia katei ka jingpyrshah jong ka ia ka jingpynbna kaba la pynmih ha ka 2 tarik u kyllalyngkot kaba la kdew ba ka sorkar ka thmu ban shim jaka ha ki thain Mawshun bad Pyrdiwah na ka bynta ban pyndep ia katei ka jingthmu ker sainar shiah.
Lah ban kdew ba katkum katei ka jingpynbna ka sorkar ka don jingthmu ban shim ia ka jaka kaba don ka jingheh kaba 52,580sq/m.
“Ka CCIB haduh mynta ka dang iai pyrshah ia ka jingthmu shim jaka bad ka jingthmu siew bai jaka ka sorkar” ong u ba Kmen Myrchiang haba ia kren bad ki nongthohkhubor. U bah Kmen u la ong ba ka CCIB ka pyrshah bad kam sngewtynnad ia ka jing jingleh ka tnad Khlaw ( Forest) bad ka tnad bording ( MeECL) kiba la leit ban jurip lypa bad ban pom ia ki dieng na ka bynta ban pyniaid ia katei ka jingker sainar shiah bad tan bording ha katei ka thain. Katei ka jingpyrshah jong ki ka dei ruh nyngkong eh namar ba ka sorkar kam pat lah ban pynbeit ia u pud u sam.
Katkum ka jingong ki nongialam ka CCIB ki la ong ba haduh mynta ka sorkar kam shym la kynthup lang ban jurip ia ka jingker sainar ha shilynter ka khappud India bad Bangladesh ba la pynkhreh da ka National Building Construction Corporation (NBCC) . Ki la ong ruh ba ia katei ka jingker sainar shiah ym shym la pdiang ruh da ka ri Bangladesh.
Shuh shuh ki la ong ba ka sorkar ka la thmu ban leh jubor ia katei ka kam khlem da ioh ia ka
No Objection Certificate (NoC) na ka Khasi Hills Autonomous District Council (KHADC) bad wat ka KHADC ruh kam pat pynlong ia ka jingialang paidbah lane ka public hearing ban sngap ia ka sur kiba bun balang. Ki la iathuh ba lada jia ba ailad ia katei ka jingker sainar shiah kumba ka sorkar ka la thmu kan poi haduh pdeng shnong ruh ha ki shnong kum ka Lyngkhat, Pyrdiwah, Iarbamon, Kongwang, Umsyiem bad kiwei kiwei.