Treilang ka tnad pynroi sor bad ka KHADC ban kyndang khar die madan

Shillong, 28Iaiong:
Ka tnad pynroi sor ka sorkar jylla kan ia treilang bad ka Khasi Hills Autonomous District Council ( KHADC) ban kyndang ia ki khar die madan kiba shong pynkhapngiah ha ki rud surok ha kylleng ka nongbah Shillong. Ia kane la pyntip da ka myntri kaba dei peit ia katei ka tnad ka kong Ampareen Lyngdoh hadien ba ka la ia kynduh ia u Chief Executive Member ka KHADC u bah Adelbert Nongrum.
“Ngi donkam ban iatreilang bad nga sngew kmen ba ngi don ha ka juh ka jingmut bad ngin iaid shakhmat ia ka kam” ong ka kong Ampareen Lyng doh haba kren sha ki nongthohkhubor mynta ka sngi hat majai. Ka kong Ampareen ka la ong ba katba nangiaid ka por ki khar die madan kiba shong be-ain ki la nangroi ha kylleng ka nongbah bad ki la klun ruh ym tang ia ki lynti hynrei wat ia ki surok bah. Ka la ong ruh ba namarba ki don ki jaka ba hap lang hapoh ka jingpeit jong ka tnad ka District council, ka tei ka tnad ryngkat ka KHADC ki la pyrkhat ba kan bha ia ki ban iatreilang na bynta katei ka mat.
Ka la pyntip ruh ba nalor katei ka mat ki dang don sa kiwei pat ki mat donkam ba ka tnad ba ka dei peit ka hap ban ia treilang bad ka KHADC kum ka Wahumkhrah kaba dei ka mat kaba la sdang da ka KHADC. Ki la ia kren ruh ia ka ain tei ing ne ka Building Bye Law, ha kaba ka la ong ba katei ka trei kam ha kane ka jylla, ha kane ka phang ruh ka kong Ampareen ka la pynpaw ba ka long kaba donkam eh ba ka tnad kan ia treilang bad ka KHADC namarba ki jaka ki bym hap shuh ha ka Municipal ki dei ki jaka ba hap hapoh ka jingpeit ka KHADC, kaba dei ban ai jingbit ia kiba thmu tei ing paki dulan.
Kaba pynkham long adkar ia kitei ki ar tylli ki bor mynta halor ka ain tei ing ka dei na ka jingiakren kaba la mih na ka jingjia kaba la jia ha Nepal ha kaba da ki hajar ngut ki iap ei ha ka jingkhih u jumai bah, nalor katei la ia kren ruh ia ka New Shillong Township. Halor baroh kitei ki mat ba la ia kren hapdeng jong ki, ka kong Ampareen Lyngdoh ka ka la ong ba ka kyrmen skhem ba ka jingiatreilang kan long haduh kaba kut na bynta ka jingbha u paidbah.