Treikam khlem jingartatien, ong ka SNSBH

Shillong, 29 Naiwieng:
Hadien ka jing ialang bad u Myntri Rangbah ka Jylla Dr. Mukul Sangma ha ka 05tarik Naiwieng 2015 bad ka jingpynmih khubor na ka liang u Chief Secretary, Bah PBO Warjri ha kaba u la kynthoh pyrshah halor ka jingai syrnod ki Rangbah Shnong kiba la don Sanad thymmai katkum ki Act bad ki Rule jong ka KHADC, ka SNSBH ka la leit ban ia kynduh ia u CEM KHADC ar sien arwat ha kaba la ka ioh jingpynshai na u halor ka jingpynkup bor ka KHADC ia ki Rangbah Shnong.
Ha ka jingiakynduh bad u CEM ha ka 27 tarik mynta u bnai ka SNSBH ka sngewkmen ban ioh pdiang ia ka Notification NO.DC.XXVII/Genl/ 89/2015/7 ba la pynmih da ka KHADC kaba pynkup bor ia ki Dorbar Shnong ban bteng ia ki kam kiba ki ju trei. Kumta ka SNSBH ka kyntu ia baroh ki Rangbah/Nongsynshar Shnong kiba la ioh ia ka Sanad thymmai ban trei ia ki kam khlem ka jingartatien.
Khublei Rangbah Shnong ki Seng Mawlai
Ka KSU Mawlai Circle ka HNYF Mawlai Circle bad ki Seng Samla Dong bapher jong ka Shnong Mawlai, ki ai ia ka jing khublei ba kyr pang ia ki Nongkitkam jong ka Synjuk ki Rangbah Shnong, ha ka jing ia leh bad trei shitom ka jong ki ba ki la lah ban wanrah iaka jing jop ha ka ban pynlait noh iaka jing tam pud jong ka Sorkar Lyngba ka MUDA na ka Building Bye Law, iaka Shnong Mawlai, bad kiwei pat ki shnong ha ki khap sor khamtam ia ki jaka kiba hap hapoh ka sixth Schedule Area, namar kumba ka long mynta baroh ki briew kiba la dep shna iaki iing thymmai ki la lah pat ban ioh ia ki bor ding bad ia ka um bam um dih, bad ka la pynsuk bad weng noh ia ka jingeh kaba ki paidbah ki la kynduh ha kine ki khyndiat bnai bala dep.
Na ki samla jong ka Shnong Mawlai kaba kynthup ia ka KSU Mawlai Circle bad HNYF Mawlai Circle ka kitbok kitrwiang ia ki Nongkitkam jong ka Sunjuk ki Rangbah Shnong ba kin ioh iaka met ba koit ba khiah khnang ba kin lah ban trei kham bha shuh shuh naka bynta ki paidbah, bad ngi kitbok ruh ba ka jing ialeh halor ka VAB ruh kin ym shong thait haduh ba kin da ioh iaka jing jop, ong ka kyrwoh na ki seng bapher bapher na Mawlai.