Treikam ka thma Pathankot sa ha Anjalee

Shillong, 13’lyngkot:
Ka jingshah hiar thma ka ktem ki shipai suiñ ha Pathankot ka la ktah jur bha ha kane ka jylla, kaba nyngkong eh ba ka tnad shipai ka la shim ka dei ban khang ia ka jingtuid u paidbah sha ka jaka jngohkai kaba don ha u Lum Shyllong. Hadien katei mynta ka tnad shipai ka la khang ruh ia ka jaka iad kjat ki paidbah kaba ki ju iaid lyngkot na Anjalee sha Khyndailad.
Ka tnad shipai ka la pynbna mynta ka sngi ba la khang ia ka lynti iaid kjat ki paidbah kaba ki ju iaid baroh shi katta kata na Anjalee complex sha Butcher road, Pine Walk Area sha Butcher road kaba don hajan Bawri Netralaya bad la khang ruh ban iaid na Pine Walk Area sha Khyndailad. Ha ka jingpyllait khubor na ki bor shipai mynta ka sngi ki la ong ba katei ka jingkhang lynti na Anjalee ka dei namar ka jingshah hiar thma ka ktem shipai ha kine ki khyndiat sngi ha Pathankot bad la khang ruh namar ka jingmih kiba bun bah ki kam tuh kam thiem ha ki thaiñ ka Cantonment Area. Ka tnad shipai ka la pynbna ba ka sngewsih ban mih kiba kum kine ki jingpyndik ia u paidbah hynrei ka hap pat ba peit ia ka jingshngaiñ ha kum kane ka por.
Lah ban kdew ba katei ka lynti ba ka tnad shipai ka khang ka dei ka lynti ban hiar na Anjalee bad kan mih sha ka jaka ba ki paidbah kane ka jylla ki ju tip kum ka them Bijoy , katei ka dei ka lynti kaba ki paidbah ki ia ñion bha khamtam ha ka por ba ka jur eh ka jingsheng kali ban leit sha iew, hynrei mynta ia katei ka lynti ka tnad shipai ka la khang ban iaid.