Trei shitom u MLA, ban urlong ka NRB College, ba angnud u Bah Lapang

Nongpoh:Kan da long shisha ka jingkmen kaba khraw eh ia ki paidbah kiba sah ha ki shnong bapher bapher ka thain Umden hi baroh kawei, namar mynta ka sngi la ioh ban plie paidbah ia ka Northern Ri Bhoi College, kaba don hapoh ka shnong Diwon, Ri Bhoi.

Lehse ka jinglah ban plie noh myn hynnin ka sngi ia katei ka Northern Ri Bhoi College, kan da pynkmen eh ia u Bah Mayrald Born Syiem, MLA ba mynta ka Nongpoh, namar uba la lah ban pynurlong ia ka jingangud u Dr. D.D Lapang, MLA barim ka Nongpoh bad uba la angnud eh ban urlong katei ka Kolej, khnang ba kan long ka jingmyntoi na bynta ki samla pule na kiba bun tylli ki shnong kiba don ha katei ka thain.

U Ma Vincent H. Pala, MP Shillong Seat, uba la sakhi lang ha katei ka sngi, ha ka jingai jingkren jong u, u la ai ka jingkular ba un pynioh ia ka jingiarap kaba kyrpang eh ia katei ka Kolej, khnang ba kan da long shisha kata ka jaka ai jinghikai kaba sa ai jingmyntoi ia ki samla na katei ka thain bad ba kim donkam shuh ban leit pule sha kiwei pat ki jaka. Kumba ka long mynta, ia ka building ba pura jong katei ka Kolej ym pat lah ban tei bad mynta ki 45 ngut ki samla pule, kiba la leit ban pule ha katei ka Kolej ki dang hap ban shong klas ha ki Building kiba don hajan bad ka Raid Nongtluh Higher Secondary School, Diwon, namar ia ki Building ba pura jong katei ka Northern Ri Bhoi College yn sa tei ha kine ki sngi ba wan.

Na ka jingkren kyllum lang jong baroh ki nongai jingkren ha katei ka sngi, ki la pynpaw ba ka jingwan urlong katei ka Kolej hapoh katei ka thain, ka la long shisha ka jingmyntoi kaba khraw eh ia ki samla pule ha katei ka thain bad ka ban long shisha ka jingiarap kaba palat eh na bynta kito ki samla pule kiba wan na ki longiing baduk, hynrei kiba kwah pat ban pule ia ki jingpule kiba kham shalor.

Kiba la sakhi lang ha katei ka sngi kaba la plie paidbah ia katei ka Kolej, nalor u Dr. D.D Lapang, nongaibuit ka sorkar jylla, kum u kongsan, u Bah Mayrald Born Syiem, MLA Nongpoh, u Ma Vincent H. Pala, MP Shillong Seat, la sakhi da ka jingdon ki MDC kiba kynthup ia u Bah Charles Marngar, u Bah Balajied Rani, nangta ka Kong RM Kurbah, DC Ri Bhoi, ki ophisar sorkar lem bad shibun ki nongialam shnong na katei ka thain.