“TREI SHITOM”

Dr. B.R. Marpna

Ka jingtrei shitom ka long kaba donkam haduh katta katta ha ka jingim ki briew. Ki briew kiba trei shitom kim don por ban shong lyngngai ne thiah thai. Ki ialeh kumno ban pyndep ia ka thong kaba ki angnud ha ka jingim jong ki. Lada batai ia kane ka bynta ha ka lynti kaba bniah, kan wanrah ka jingsngewtynnad ban sngewthuh shaphang ka jingtrei shitom ha ka jingim jong ki briew. Ki soh kiba thiang ngin ioh ban kheit bad kan wanrah ka jingjahthait haba ngi lah ban pyndep ia ki jingkwah lyngba ka jingtrei shitom. U Blei U ai ha la ka jong ka jong ka sap ka phong (talent) ha kaba man la u wei pa uwei u briew kaba U Blei U ai. Lada ngi trei shitom, khlem pep kan wanrah ia ka jingkyrkhu ialade shimet bad long jingkyrkhu ia kiwei de.

Haba phai sha ka jinglong ba kynja mynsiem, ka long kaba donkam bha ia kiba ngeit ha U Trai Jisu ban long kiba trei shitom. Ngi lah ban don ki sap bad ki jingai jong U Blei, la ka long ban hikai, ialap, thoh jingthoh, sneng ne ki ba bun bah kiba ngim lah ban jer kyrteng. Hooid, ki jingiakit jong ngi ha ka Balang, Imlang Sahlang bad kiwei kiwei ki long shi bynta ha ki jingtrei shitom jong ngi bad haba ngim trei shitom, ka mut ka don ka jingjaipdeh ne alhia.

Ka Ktien jong U Blei, ka hikai bha ia ngi halor kane ka bynta. Ki jingsneng na ki Proverb ba la thoh da u Solomon bad kiwei kiwei ki Nongthoh ha kane ka Kitab, ka ai jinghikai shibun eh ia ngi. Kawei na ki Proverb ha ka lynnong 10:14 ka batai shai, “u kylla duk uta uba trei da ka kti kaba alhia: hynrei ka kti uba trei minot ka pynriewspah”

Lok baieid ha U Trai Jisu, to ngin minot da kaba pynshah shkor ia kaei ba ka Ktien jong U Blei ka kyntu “Naba kumta, ko parabangeit baieit jong nga, to long phi kiba iaineh skhem, bad ki bym kynriah noh, bad kiba man kyrhai man la ka sngi ha ka kam U Trai, haba phi tip skhem ba kata ka jingtrei minot jong phi kam ju long kaba lehnohei ha U Trai” (I Korinth 15:58).

“La ka long ka jingshakri, to ngin minot ha kata ka jingshakri: la ka long uta uba hikai, to un minot ha kata ka jinghikai: lane uta uba sneng, to un minot ha kata ka jingsneng, lane uta uba iasam, to un leh kumta da ka jingkylluid sngur: lane uta uba synshar, un leh kumta da ka jingminot: uta uba leh isynei, un leh kumta da ka jingkmen” (Sha ki Nong Rom 12:7, 8)

U Blei U kyrkhu ia phi baroh.