Shillong: Ka Pakhang shnong ba la khot da ka North East Student Organisation ( NESO) ka la treikam pura mynta ka sngi ha kaba baroh kawei ka sor Shillong ka la kynjah jak. Ha ïewduh ym shym la don kawei ruh ka dukan kaba plie, nangta ha Khyndailad ruh baroh ki dukan ki la khanglad ha ki kynta jong ka pakhang shnong kaba la sdang naduh ka por 5 baje mynstep haduh ka por 4 baje janmiet.
Ki surok bah ka sor Shillong ki la kynjah jar mynta ka sngi hynrei la don tang katto katne tylli ki kali kiba iaid kiba dei ki kali kit nongpang bad ki kali leit ing iathoh kiba the balloon. Ka thaiñ Jaiaw, Mawkhar, Mawprem, Mawlai, Polo bad ki thaiñ Lachumiere bad ha ki khapsor kum sha Upper Shillong ki la kynjah jar jar mynta ka sngi bad la iohi ba ki ophis sorkar, ki ophis kompeni ruh bun kiba khang. Ha ki thaiñ Mawlai, Jaiaw , Mawprem la iohi ba bun ki khynnah kiba ia lehkai phutbol, kiba ia lehkai Kriket bad kiba ñiah saikil hapdeng surok.
Ha kitei ki kynta jong ka pakhang shnong la iohi ba ki pulit ki la ap pahara ha Motphran, Khyndailad bad ki pulit ki don ruh ha manla ki ing sorkar bad la iohi ruh ba ki pulit, ki Majistor ki iaid pahara tawiar ia ka nongbah Shillong. Ka la saphriang ruh ka khubor hamsaia ba ka don ka jingshah thang kali ha ki bynta jong ka Mawlai,Mawiong hynrei haba ki nongthohkhubor ki la leit wad ym shym lap satia ia katei ka jingjia.
La ioh lum jingtip ruh ba katei ka pakhang shnong ka la treikam bha ruh ha ki sor rit kum ha Nongstoiñ , Nongpoh, ha Sohra ruh la iathuh ba ka treikam bha ha kaba ki dkhot sengbhalang ki la khanglad ia ki nongtrei sorkar ban leit trei, ha Pynursla ruh la iathuh ba ka la don ka jingkhanglad ia ki nongtrei sorkar ba kin leit sha ophis hynrei la ong pat ba kam shym la don satia ka jingpyrkhing ia ki paidbah nongshong shnong ba marjan ban ia die ia thied ne ban ia plie dukan hapoh shnong.