Shillong:Ka khlam sniang, lane ka African Swine Flu, ka la pyniap ia 17 tylli ki sniang ha ka shnong Amlari Model, kaba hap ha ka Amlarem Civil Sub Division, West Jaintia Hills District.
U Ma TP Suja, uwei na ki riew rangbah jong katei ka shnong, uba dei ruh u nongri sniang ialade, u iathuh ba ki sniang jongu, ki la iap lut baroh 15 tylli.
“Ka jingsdang jong ka jingpang, ka dei lyngba ka jyrhoh, shit met, jngem snam ka doh bad kawei kaba pun khun ruh, ka hap khun noh” ong U Ma Suja, haba iakren bad U Rupang.
Ka jingpang jong ki sniang, kam dei ha kajuh ka por, hynrei ka iabud hapdeng shi taiew na kawei sha kawei pat bad u iathuh ba katei ka jingpang, ka sdang naduh ka taiew ba khadduh jong U Rymphang bad ha ka shiteng U Lber, ki la iap lut plain ki sniang kiba u ri, ha katei ka Shnong bad utei u rangbah, u iathuh ba ula duh nong la T.1.5lak na ka jingiap jong kitei ki sniang, kiba u ri, ha ki saw tylli ki sem.
Ym tang katta, u iathuh shuh shuh, ba ka don kawei ruh ka seng, kaba don hajan ka sem jongu, kaba jngai kumba shiteng kilometre bad hangtei ruh, ka la poi katei ka jingpang ia bit bad ki la don ar tylli ki sniang, kiba la iap, na kajuh hi ka jingpang.
La iathuh shuh, da utei u rangbah, ba ula pyntip sha ki nong sumar sniang na Amlarem, ha kaba ki la wan ban ai injekshon ia ki sniang jongu ar tylli, hynrei kaba sngewsih, ka long ba kitei ki sniang, kiba shah injek, na bynta ka khlam Swine Flu, ki la iap noh, mar ia dep injekshon bad mar ia phet, kitei ki nong injek na ka tnat ri jingri, kaba don ha Amlarem.
Ka shnong Amlari Model, ka don la kumba 100 tylli ki iing briew bad ka don kumba 15 Kilometre na Amlarem.
Phi don ban ong eiei?