Trei ka khlam corona, sa ia ki nongtrei ka Bank shna pisa

Ka khlam corona, kaba la syngngeit jur ia ka jylla Maharashtra, ha ki bun bnai ba ladep; mynta ka kynti, ka la rung syndon hapoh Bank thaw pisa bad kata ka long ha ka Currency Note Press (CNP) kaba don ha Nashik jong ka Jylla Maharashtra.

Katei ka jaka shon pisa, kan khang na ka bynta san sngi kynthih bad ka daw, ka long namar ba ki don 40 ngut ki nongtrei jongka, kiba ioh pang corona virus. Katei ka Bank, kan khang haduh ka Sngi Palei, hadien ba 2 percent na ki nongtrei jongka, ki la ioh ia katei ka khlam corona.

Kitei ki nongtrei ki kynthup ruh ia ki katto katne ngut ki ophisar bad sa ki nongtrei kiba peit ia ki kam mashin.

Ka Currency Note Press, Nashik (‘CNP Nashik’), ka shon ia ki kot tyngka kiba bha tam ha India bad kumba 40 percent na ki kot tyngka jong ka India, la shon ha katei ka press ha Nashik bad sa ka shnat jongka, ha Bank Note Press, Dewas.Ka CNP, ka shon haduh 4,872 million tylli ki kot tyngka, na ka bynta u snem 2016-17.