Trei jur ka politik ha ka Congress, sangeh wan Shillong u Faleiro Ngam bna eiei ia ka dawa jingpynkhyllem:Rowel

Shillong 11 Nailar:
Ka Prokram ba la buh ban wan u General Se cretary ka AICC ba peit ia ka Meghalaya u Lui zinho Faleiro ban iapyn beit ia ka kynrum kynram hapoh ka seng Congress ha kane ka jylla, la pynsa ngeh noh.
Ha ka jingshisha, u Faleiro u la buh ban wan hiar sha kane ka nongbah lashai ka sngi ka 12 bar 13 tarik Nailar ban ia kynduh ia ki MLA ka Party ha kane jylla hadien ba la mih ka jingiakhih ban pynkhyllem ia u Myntri Rangbah u Dr Mukul Sangma.
Kane ka jingpep kynsan jong u Faleiro ka la kdew ba ka la don ka jingiakhih politik kaba jur bha khamtam ka jingiatan tyllai hapdeng ka kynhun jong u Bah DD Lapang u president ka MPCC bad u Myntri Rangbah u Dr Mukul Sangma. Haba iakren bad u Bah Rowel Lyngdoh hynne ka sngi u la iathuh ba mynshwa u la ioh jingpyntip na u President ka MPCC ba un wan u general secretary ka AICC ba peit ia kane ka jylla ha ka 12 bad 13 tarik hynrei la pyntip ba um wan shuh mynta. “Ngam tip kaei ka daw ba un wan hynrei la shu pyntip ia nga ba un wan hynrei la pyntip mynta ba um wan shuh”, la ong u Bah Rowel uwei na ki nongialam ba kham rangbah ka party Congress ha kane ka jylla.
U Bah Rowel uba dei ruh u Symbud Myntri Rangbah ka jylla, u la kyntait ba ka don kano kano ka jingiakhih ban pynkhyllem sorkar bad u la kam, ba um tip um bna eiei ia kane. “Nga shong hangne (myntri sorkar) ka shong ha ka party, lada phah shong nga shong bad lada ka phah hiar nga hap ban kohnguh”, la ong u Bah Rowel bad bynrap, Ngam tip ia ka daw, balei donkam ban weng ne pynkhyllem”.
U la ong, “Ngam ju iakynduh MLA ngam ju kynduh myntri bad ngam tip eiei ia ka jingiakhih” bad u la ong biang, “Ka jingpynkyllem ka jingweng kan shong ha ka jingialang jong ka jingbunpaid ha ka party”. Lah ban kdew ba ka kynhun hapoh ka jingialam jong u Bah Lapang, kynthup Bah Prestone Tynsong, Bah HDR Lyngdoh, u MM Danggo ki la leit kynduh ia ka Sonia Gandhi bad u Rahul Gandhi ban dawa pynkylla nongialam ha kane ka jylla. Ha kawei ka tyllong khubor, la iathuh ba ka kynhun ba thmu ban pynkhyllem ia u Dr Mukul, ka la kam ba la don kumba 16 ngut eiei.